午餐新聞特別播出---自製銀針粉

今日感覺特別亢奮，全身充滿力量咁，一早起身就洗佐一大機的衫，跟住換埋抽油煙機的過濾網，抹到個抽油煙機靚一靚，順手抹埋廚房抽風扇，抹勻成屋傢俬，連魚仔的水缸都換埋水，最后拖個地，先至衝個香香涼~~~

整間屋窗明几淨，睇落個人心情都靚佐好多~~

只不過大動作之后，個肚，突然一陣咕咕聲~~

肚餓啦`~~

不過俗語有講「有強嫂，就無煩惱」

睇下強嫂幫自己變佐D乜出黎慰勞下自己~~

好鐘意銀針粉獨特的口感，問過屋企長輩做法，再參考佐少少網上的食譜，材料自已都有齊，即時開工~~

材料就係「澄粉120克、木薯粉8克」

係咁簡單~

作法：1，用滾水一杯，大約200毫升，鹽一匙仔，撈勻成鹽水。

2，滾水衝入粉度，趁熱搓成團，跟住搵張濕佈或者好似我咁，廚房紙濕少少水，蓋住，醒面十分鐘度。

醒面的時間，準備材料。

我切佐D青紅椒絲、腸仔絲、一個雞蛋絲。

好啦，材料準備好啦，面團亦都醒好。

3，用手取一團仔粉團，雙手來回搓成長條狀，跟住撈少少油防止痴埋。

4，最后猛火蒸四五分鐘，焗一焗再羅出黎~~

睇下，好靚的銀針粉就咁出黎啦~~~

炒就簡單啦。。。

先準備好一個薄芡水「薯粉、水、糖、鹽、雞粉、胡椒粉」

跟住熱鑊落油，炒香青紅椒絲同埋腸仔絲，最后將銀針粉倒入，加少少豉油（因為粉入邊本身落佐鹽，有咸味，所以只需落少少豉油上色同埋有少少豆香），少少胡椒粉，炒勻，盛起裝碟。

另外起鑊，煮熟芡水，倒入蛋絲，最后淋上炒好的粉上邊~~

香香滑滑的一味炒銀針粉，唔使出街，自家都可以有得食~~

係未好簡單咧`~

 

 

 

九號台風夜之花生豬手煲

前日香港開始挂三號颱風，我扭計係都要係風台之前去迪斯尼玩，強哥唯有擺抵工作，陪我玩足一日，傍晚從迪斯尼出到欣澳站，一上到月台，眼前的景色，靚到出唔到聲~~

好彩相機我一路係頸度挂住，睇到如此美景，即刻開機影佐幾張，短短十幾秒鐘之后，夜色就將剛剛的美艷吞噬~

已經極力想將睇到的情緒記錄落黎，但係能力有限，影到的美景，只不過係真實的千分之一~

紅到發紫，當係如此~~

強哥話，越靚的天空，代表黎緊會有越危險的天氣。。。

果不其然，琴日天文台挂起九號台風。。。

所有人，無端又多佐一日假期~~

--------------------------------------------------------------------------------

尋日訓醒之后，無乜胃口食野，就煲佐一煲綠豆糖水。

強哥好鐘意食珍珠奶茶入邊的珍珠，所以屋企我都會備有依種台式丸子，通常賣台灣食品的地方都可以搵得到。

 

依種小丸子的煮法唔難，係時間長D嗜，我通常係水滾之后落丸子，滾十分鐘度，間中加二次凍水，等佢熱脹冷縮，煮得會快D，係咁係滾水度煲十分鐘之后熄火唔開蓋焗二十幾分鐘直至丸子全透明，食之前浸係凍水中，以妨痴埋~

煲佐一大煲香香濃濃的綠豆糖水，加佐D意米落去同煲，有解毒去濕氣作用，食之前加一大匙小丸子落去，增加口感~~

熱食最正~~

因為挂九號台風，樓下惠康都收埋。好彩我前日買落D送擺住，就算唔出街，都有得美味晚餐食。

早幾日煲湯剩底一條粟米，剝佐粟米粒出黎，切D香菇，落少少蚝油炒熟，咁的一碟，就係我的主食啦。。。

所有的味道同蚝油異常的格。。。好好味~~~

雪櫃有一包半焉的菜心，愛黎用水烚熟之后，淋D蚝油，簡單~

凈係食齋強哥肯定唔制啦，當然預佐好野俾佢。

早幾日係百佳睇到好靚的豬腳仔，即時流晒口水咁買返黎。

好耐無食花生豬手煲，就用佢來同花生燜。。。

材料及作法：

1，花生先落水烚一烚（通常花生無論煲湯或者煲粥，一煲得耐就會越煲越深色，想花生煲極都咁靚，我屋企的秘訣，就係煮之前先用水略略烚一烚）

2，豬手出一出水，俾個豬皮收縮，方便我除毛。我好有心機咁，將D豬毛清理得好乾淨。。。因為真係好唔鐘意係滑滑的豬皮度，食到D硬硬的豬毛，唯有食之前，辛苦下，搞乾淨佢羅`~

3，煮依個送的香料無須好複雜，外婆教落阿媽，燜帶皮的豬肉，最完美的香料搭配就係八角同蒜~

依個做法，阿媽又傳佐俾我~~

所以依次整豬手煲，主要香料都係「冰糖一舊、生老抽一碗仔、八角一粒、蒜多少少、薑一細細粒仔」

再睇多次，靚靚豬手仔~~

4，處理晒D材料，做法就超級簡單啦，所有材料擺落煲度，加適量水燜至腍軟，就得啦。。

幾時都係整肉類的食物最簡單啦。。。。

我係用快速煲黎整，半個鐘左右，經已腍到「入口即化」的程度~

睇下D花生，煲極都係咁靚啵。。。

 

正~

 

入口即化---奶油馬拉糕

今日大台風，出唔到街，無無聊聊，將我以前整過D點心整理過黎擺係BLOG度。

材料：牛油20克+豬油20克+雞蛋二隻+低筋面粉110克+紅砂糖80克 另外總有酵母粉一細匙+梳打粉一DD（我都無具體量度，只是憑感覺落）

 

基本上依個食譜係無落水架，如果覺得太結，可以加多一個雞蛋或者少少牛奶去開個粉漿，基本上我用既蛋好大隻，所以蛋同油已經足夠開到個粉漿，同埋后期因為唔想食得太油膩，所以我自己減少佐油既份量，而增加佐雞蛋既個數。

依個隨個人喜好去定啦，基本上影響唔係好大，最緊要係發酵效果。

作法：1，將豬油同牛油隔水蒸融（微波爐亦可）

睇下，一碗仔油。就係因為有佐依二種混合油，令到個點心更香更滑

2，將所有材料撈勻，如果太潔適當加少少牛奶

（酵母粉可以先用暖水開佐佢，蘇打粉係為佐中和酵母粉既酸味）

所有材料撈勻之后靜置二三個鐘等粉漿發酵。

3，容器入邊擦一層油，方便蒸好之后脫模

4，將粉漿倒入容器度，水滾之后擺入鑊度，蒸佐二十分鐘度，發得好靚~~~

剩底DD仔粉漿，用佐一個細細的盤仔，又蒸佐一碟仔，倒入黎睇下，幾Q~~

可惜我心急，未攤凍就倒出黎，有少少痴底。

切開一半睇下入邊的組織，發得好靚，一個一個窿~~

好鬆化~~

依個做法的馬拉糕，做佐好多次返去俾老爺奶奶，老爺勁鐘意食，人前人后咁贊我整馬拉糕好掂~~

其實係因為紅糖本身有一種淡淡焦香味，加埋牛油豬油的香味，經過發酵之后，無論係味道或者口感，都當然無得頂啦~~

蒸多一底，俾我阿娘~~

 

 

繼續住家菜

煲佐一個下火既簡單湯水---芫莤豆腐魚腩湯

落佐勁多芫莤，啖湯濃而不濁~~

D豆腐愛黎點辣椒豉油，好好味`~

蝦仁炒西蘭花，落佐少少潮州欖菜，好送飯~~

煎佐二個蛋俾強哥~~佢話自細食到大，點食都唔會厭~

---------------------------------------------------------------------------

尋日鹵佐幾個細細牛腱當零食，晚上切佐半舊，同蕃茄洋蔥，加少少豉油同埋糖0急炒做一碟~

再炒多一個菜心~~

又再煎多一個荷包蛋俾佢~~

聽聞細個果陣時，強哥一個荷包蛋可以扯二碗飯咧。。。

不過蛋汁撈飯，又真係幾惹味~~~

 

趕住煲電視劇，係咁多`~

 

 

 

自製黑椒豬肉脯

嗜肉成狂。

無論是主食或零食，一概的無肉不歡。

喜歡美X香的肉干，味道好，口感香。

其實在家里也能做出類似口感的肉脯，只是味道上肯定會有區別。

材料：免治豬肉適量、叉燒醬一匙、黑椒醬二匙、黑椒碎適量

作法：1，將所有材料撈勻

2，取錫紙一塊，用匙梗背抹平抹勻厚度。形狀及大小自行調較。

整理好形狀待用。

3，焗爐預熱之后，一百五十度火焗半個鐘左右，二面翻轉。

4，出爐前擦一層蜜糖，增加色澤及味道。

我擺在架子上攤凍定形。

如果鐘意干一點的，可以整得薄一點再烤，同埋烤的時間再長一些，喜歡口感厚一點的，可以整得厚實一點。

睇下，夜晚睇電視的絕佳零食~~

味道可以自行調制至個人喜好~

 

 

唔使煮有得食，最幸福

自細我自己外家人口較少，而且家教甚嚴，長輩的「食不言，寢不語」係必需遵守的最基本規矩。基本上成餐飯係靜悄悄地開始，再靜悄悄地結束。

尋晚又係家庭聚會，一直都好鐘意返奶奶度食飯，因為老爺奶奶加埋強哥四兄弟同埋女朋友，一家人座埋最少都有九個十個人，食飯更是百無禁忌，個個你一言我一語互相講訴各自一周見聞與經歷，一餐飯基本係個口同個耳都無停過，我個人比較訥於言，基本上係聽的多，講得少，但係真係好享受依种好濃既家庭氣氛。

早前整佐蓮藕餅得到強哥大力讚賞，尋日整佐一大碟返去俾幾個叔仔送啤酒~

一碟香口既蓮藕餅，最快清場~~

奶奶反而唔係咁識整扣肉，幾個叔仔強烈要求我整一煲返去，提前一日就整定一大煲，擺佐一日既梅菜扣肉，入味之餘，完全酥軟，入口即化~~

幾個叔仔食到出唔到聲，老爺即刻話「以后過年，扣肉項目，就交俾家嫂啦」

依個梅菜扣肉我以前有整過影過相，有興趣學整的朋友可參考以下網址：

http://hk.myblog.yahoo.com/fei12478/article?mid=87

以下就係奶奶整0既送啦~

例牌都有的鴨亦燜香菇

菠蘿炒雞

蛋蒸蟹

魚膘讓蝦膠

白灼蝦

 

清蒸石蚌

青紅蘿蔔粟米湯

雖然次次都係差唔多既送，不過，重在相聚嘛。。。。