小菲菲俠自煮樂

30 10月, 2009

懷舊小食---牛耳酥

同大家介紹一個無乜難度,材料亦都隨手可得,食起香脆可口嘅小食---牛耳酥。


唔使繁複嘅製作工具,簡單嘅製作過程,無乜失敗嘅可能性,我誠意推薦大家得閒時係屋企嘗試下。


睇下,尋日無聊之下隨手整佐份嚟磨下牙嘅小食。


同街售嘅外形是否相似。。。



我整佐兩款,一款極薄身,一款稍厚身,各有唔同嘅口感。



 


材料與做法:


1,普通面粉  75克


   水        45克


 


將兩者混合,揉成白面團。



 


2,準備“南乳四分一磚、豬油或普通炒菜嘅油二茶匙、白糖30克、鹽一細細茶匙、蘇打粉一個指甲蓋咁多、蒜蓉一細匙



 



3,準備暖水  30克


   面粉      100克


 


與步驟2的材料混合揉成面團



 


依個時候,所有材料已經準備妥啦。


雙色面團。



 


4,將兩個面團搓成相同大小的面片,白的在底,紅的在上,重疊在一起。



 


5,然後卷起,用保鮮膜包起,雪半個鐘到,等面團變硬,先至比較容易切成形和切薄。



 


6,將雪硬嘅面團取出,用刀橫切薄片,越薄越好。


依個時候我就分為兩種,一種係直接切薄片,第二隻係切好片之後再用木棒搓到佢薄一薄。



 


睇下,一陣工夫已經整佐好多。。。



 


7,最後,用細火煎至轉色即可。



 


就咁簡單咋。。。。


食譜上嘅份量,合共就整佐咁樣一袋仔出嚟。夠我幾日磨下牙㗎啦。。。



 


老公就較為鐘意食薄身果隻,夠脆口。。。。



 


剛剛返得嚟幾日,有事又要外游數日,暫時都回復唔到大家嘅問題啦。。。。


唔覺意睇到,原來自己上佐精選BLOG喎,記錄下。。。


唔怪得突然依幾日多佐咁多人。。。。



 


29 10月, 2009

住家小菜---香菇紹菜、咸蛋肉餅

尋日無出街,求其係樓下惠康買佐少少餸。


可選擇的不多,但求一菜一肉。咁就買佐條紹菜。


浸三朵香菇,切少少指天椒,少少蒜蓉。


 



先用油爆干香菇,倒入蒜蓉同辣椒同炒,然後倒入紹菜,落少少雞湯煨入味,落少少鹽調味,出鍋之前打返個生粉芡,令成碟餸食落口感滑好多。


辣辣啲,香香哋,清清哋。。。。



 


買佐盒免治豬肉


1,豬肉用豉油,糖,雞粉,生粉,一粒咸蛋清,油,水攪至起膠。


2,將肉餅舖係碟面,然後取三隻咸蛋黃,擺係肉餅面。


(咸蛋自己用雞蛋醃,體形較細,未夠時間,所以香味同咸味都不足,失策)


3,煲滾水之後將肉餅擺入鑊,猛火蒸十分鐘。



 


淋少少生抽係面度,搞掂。。。。



 


加埋隔夜湯半煲,二餸一湯,清清哋,幾好`~



 


 


28 10月, 2009

食筍之---茭白筍

承接上一篇,油豆角排骨煲。


豆角食完,排骨反而凈返一碗仔,因為排骨本身已經好腍好香,唔想浪費,所以買佐份茭白筍搭配再炒埋一碟。


依家未係食茭白筍嘅最好季節,不過我好鐘意食筍,所以都買佐份返嚟,排骨本身已有足夠味道,所以我凈係用少少指天椒爆香個鑊,再倒入切好絲嘅筍爆一爆佢,然後倒入帶有湯汁嘅排骨,略燜至收汁即可。


舊餸新食之筍絲排骨。


叨排骨嘅光,本身極淡味嘅茭白筍,配以若隱若現嘅辣意,依味餸,極之惹味。



買佐舊五花腩,預第二日整回鍋肉用。依日烚熟之後,趁新鮮,先切佐一半薄片,做個蒜蓉白肉。


咁樣較能食到肉嘅鮮味。不過太流,所以凈係切佐細細一碟仔已足夠。



 


兩個人,好簡單嘅一餐。



 


-----------------------------------------------------------------


好多人唔敢食筍,我偏獨好依一味。


若囫囵吞枣般地將之食完,只覺筍之無味,其實筍獨有嘅清淡竹香,須細細品味,先至能夠品嚐個中滋味,很有一種與世無爭,我自精彩嘅味道係入邊。


早一日食過茭白筍,意猶未盡,尋晚又再買嚟整多次。


為突出筍本身嘅味道,又令視覺上更為豐富,配以同樣本身都屬清淡味道嘅「甘筍同木耳」做配搭。



唔想破壞食物本身嘅味道,只簡單地落油起鑊,將所有材料倒入略略爆炒,然後倒入少少雞湯,煨至收汁,落少少鹽調味,已經足夠。


極之清爽雅致嘅一道餸菜。



整多款惹味嘅餸菜俾強哥,青椒回鍋肉。做法以前講過,唔再重複。



天氣略見乾燥,煲返個清潤嘅湯水飲下。


自家煲湯,當然落足材料。


青紅蘿蔔粟米,雪耳,紅棗杞子,一塊靚陳皮。


材料係咁多。



用紫砂煲,慢火煲足二個幾鐘。



極之清甜滋潤嘅一煲湯水。



兩餸一湯,白飯任裝~~



 


 


 


27 10月, 2009

東北菜---油豆角燜排骨

有朋友家人由內地東北新鮮寄佐當地特產過嚟,友人非常慷慨地送佐部份俾我試食。


其實依隻東北先有嘅「油豆角」,我就係第一次見到,同四季豆有少少相似,不過更寬更厚身,問清楚友人做法,尋日自己亦都試整一番。



真係好多謝依位朋友嘅心意,依隻豆角真係總好新鮮。


按做法,先用油爆一爆豆角。



將豆角裝起,原鑊落油,爆香少少花椒粒,咁油入邊就有佐花椒味,花椒爆過油就無味啦,要掉佐爆過油嘅花椒。


然後將蒜蓉同薑絲用有花椒味嘅油爆香,倒入排骨干炒至轉色,我屋企有少少五花腩,見豆角咁多,排骨似乎少佐啲,就加埋五花腩入去。



 


跟手落生抽老抽糖,少少花椒粉,落水,燜二十分鐘左右。



豆角本身特有嘅清香味道同排骨融為一體,成煲嘢真係好惹味,再次多謝依位朋友咁好嘅介紹。。。


依隻豆角有D似四季豆嘅味道,我諗下次可以用四季豆代替整返依味餸。



 


打邊爐凈返少少豆卜,買佐盒豆苗仔,炒成一碟。。。



 


兩餸無湯。



 


 


 


26 10月, 2009

打邊爐

天氣一涼涼哋就想打邊爐。


先講下食邊爐我必備嘅自製醬汁。


用佐「蒜蓉、蔥蓉、荽莤碎、指天椒」



落生抽或蒸魚豉油落檸檬汁落花生醬(幼果隻)


唔使落得太多生抽㗎,因為蔥啊荽莤啊會自己出好多水。過一陣會稀好多。


酸咪咪,香噴噴,辣辣哋,勁惹味。



湯底:


落一盒史乜生雞湯,落多一大碗水,二隻細蘋果,一條粟米,少少紅棗杞子,煲半個鐘左右煲出甜味。


勁清甜勁香嘅一個湯底,打邊爐之前,飲碗湯先~~


因為個湯底好清香同埋已有咸味,其實D材料食嘅時候,唔使點醬汁,都好好味㗎啦。



 


丸子拼盤。。。食凈好多。。。。



 


杏鮑菇切片,打邊爐好好味,碌幾耐都係好爽好清甜。。。。



大量荽莤,長豆泡。其實都係豆泡咁嘅味,只不過個樣特別少少,長嘅?ha~~



 


唐生菜,清甜~~



 


魚皮角,鳳城出品,好味。。。。



 


肥牛,加埋自製醬汁,無得頂~~~



 


打邊爐最開心,乜都可以碌下碌下。。。。


準備功夫又少,食完要洗嘅碗又少,真係一個極好嘅選擇。。。。


 


22 10月, 2009

住家小小菜---芋頭扣肉煲\豉香煎茄子

抹一抹汗先.今日連續寫做六個食譜,都分十幾日POST出嚟,應該夠我返嚟之前用了掛.


HI~~依家你睇到嘅,依然都係電腦自動發送嘅文字,所以你嘅問題,我無法及時回答,請在聽到"AAAAA~~~~!~!~~~"五聲之後,留抵你嘅口信啦~~~


-------------------------------------------------------


茄子.


上次講過,茄子可以蒸過之後再用油煎香.


其實唔一定要蒸㗎.就咁切好嘅茄子,落少少水,細火煮熟.撈起.


 



然後落好似你睇多嘅,一湯匙油.



爆香蒜蓉,然後倒入煮好嘅茄子,煎香香,落蒜蓉豆豉醬較味.


我唔落鹽,驚個味會唔均勻.



 


一碟又簡單,又香口,又惹味嘅豉香煎茄子,就整好啦.



 


勝瓜加瘦肉加豆卜,雜不甩咁滾一個湯,搞掂~~


一個湯一個茄子.....



 


----------------------------------------------------------------


另一個夜晚,整佐芋頭扣肉煲.


芋頭炸熟,五花腩焗脆個皮.



 


醬料"生抽老抽,蒜蓉,冰糖碎碎, 腐乳三磚細細磚"



加水多D,撈勻.因為芋頭好縮汁~~



 


五花腩同芋頭排好,將醬汁淋上.隔火用快速煲煮佐半個鐘.腍曬~~



 


倒扣入細煲仔,食時加熱~~



 


AAAAA~~~~