小菲菲俠自煮樂

31 1月, 2010

為妻之道---出其不意,投其所好

依個世上,有兩類人,絕對縱不得---男人與孩子


當所有行為已經變成習慣嘅時候,習慣亦都變成佐合理與理所當然。


譬如你義無反顧,持之以恆地對佢啲好,日子有功,對方就會將你所有嘅付出視之為理所當然,並不以為然。


在可見到嘅結果之前,就要在一開始,需先下手為強,杜絕惡習,樹立態度。


所以,對兩類人---男人與孩子,由一開初,就要堅定立場,態度鮮明,不要俾佢啲誤會,所有付出,都係理所當然。


舉例說明:同老公初初結婚,雖然自己開緊舖頭亦都賺緊錢,生活方面絕無問題,但係同樣會要求老公俾出一定數額嘅家用自己,其目的,就係為佐令男人明白到,自己係婚姻關系當中需要付出嘅「責任感」。


做為妻子,一點都唔需要羞於開口,因為依個關乎到未來幾十年,做為先生對於家庭嘅心態基礎。


男人係一種「唔講唔識」嘅生物嚟㗎,千其無天真地認為男人天生就識得責任為何物,其實男人係完全唔明白女人嘅心態同埋「係度諗緊咩」㗎,所以同男人相處,最緊要識得如何「自我表達」,一定要將內心真實嘅感受同需求清楚表達俾對方知道,至於對方如何反應,就不在自己可控制範疇了。


當然,對於男人,一味要求對方付出,亦都係唔理智,同埋唔公平嘅。對方唔係傻㗎,你對自己係點樣嘅態度,相處落嚟,都肯定能夠感受得到,如果想婚姻關係得以持久,對家庭嘅態度,應該係彼此都需要有所付出,有所改變,至於細節如何,就要視乎個人能力去操作啦。


 


所以間唔中,都要俾少少甜頭個男人,等佢繼續,義無反顧地為頭家,心甘情願付出他的所有~~~


依個時候,就要識得「投其所好」啦。


譬如:知道老公近排都好期待睇「阿凡達」,咁我又出佐去唔係屋企,所以一返到嚟,提早兩日就去戲院訂佐飛,選好一個靚位,(買佐周日嘅早場,11:40嘅戲飛,平好多㗎)咁起身後總可以施施然,去享受一個靚嘅早餐,然後先至去睇戲,都安排好啦~~


而方式,就要「出其不意」啦,買飛之前完全無同老公講過,買好飛返嚟,將飛擺係佢一返屋企一定會睇得到嘅地方「佢電腦上邊」,由得佢自己去發現。。。。。


果不其然,我係廚房炒緊餸嘅時候,老公衝入廚房,好開心咁同我講「BB,你真係我最好嘅BB嚟嘅」


食飯嘅時候,一邊食一邊總開心地搖頭晃腦「我老婆對我係最好嘅」~~~~


區區一百幾十蚊,就可以冧到個男人咁深,真係抵到爛啊。。。。。



 


提早買佐栗子,整定一包仔糖焗栗子帶去戲院睇戲時食,幾開心啊。。。。


栗子做法可參考以下網址「糖焗栗子


 



 


再編張獎狀出嚟,寫埋老公嘅名,痴係最當眼處,時時提醒佢,佢要保持做個「最佳老公」


哈哈哈`~~~



 


 


30 1月, 2010

惹味自家制---栗子燜雞、上湯浸豆苗

買佐兩磅桂林嘅椎栗。


一半用嚟煮雞,另一半愛嚟整「糖焗栗子」


Show下我係一間台灣超市買到嘅小玩意「栗子夾」


以前用刀係栗子上邊斬一條口,真係一步一驚心,最擔心一個唔小心,斬錯栗子旁邊嘅手指,實在栗子又硬又滑嘛。依家有佐依個小工具,真係超簡單,輕輕一夾,就將栗子整開一個口了,然後用剝就可以將皮剝開。



 


當然,街市都有賣已經剝好皮嘅栗子,係我貪得意要自己試用依個夾仔,咁剝佐皮,總有入邊嘅一層衣點去除咧,好簡單,用滾水煮一煮一分鐘,再過一過凍水,好輕鬆咁,就可以除去栗子外層嘅衣啦。



 


點解今日要買栗子咧,主要原因,係母親的朋友送了幾隻自家果樹下圈養的雞,媽媽留了一隻俾我。



與市售活雞,有絕對質的區別。
自家果地下養嘅雞,食嘅係天然嘅蟲草同大米,所以養出嘅雞,肉的味道鮮美非常,因為有大量嘅活動空間,所以咬落嘅口感係結實香滑嘅,美味自不言而喻,就算係雞骨頭的味道,都有著非常大的區別,香港買到嘅就算係走地雞,雞骨都係好脆好易斬斷,而依類少量圈養嘅雞,連雞骨都異常鮮美。



講起骨頭,我對骨頭有一種本能的天生的靈敏度。



若相信今生前世之說,咁我肯定我前世定必係一條可愛的狗仔。
無它,我非常能體會狗仔追著骨頭咬的心情,因為我自己就非常非常地迷戀骨頭的味道,特別係煲湯用嘅果種筒狀的骨頭,煲湯煲到骨頭完全酥軟的狀態之下,骨頭頂端圓圓的果個部位,其實都係幾硬下嘅,偏又係我最喜歡咬的位置,一咬落去,舌尖觸碰到骨裏頭果種網格狀的質感,已經開始有一種非常喜悅的情緒,再經由舌尖慢慢吸進一點點的骨頭裏的汁液與香味,咬一咬骨頭,吸光骨汁,再將渣吐出來的過程,果種精彩與內心滿足的程度,完全係無與倫比的。



幾乎可以話,就係依種“嚼”與吐的狀態,讓我深深地迷戀。。。。。幾變態下㗎~~~哈哈哈~~~不過都證明到,我嘅「牙力」都幾好㗎~~



尋晚就用阿媽俾的這隻雞,做佐個栗子燜雞。


---------------------------------------------------------------


做法:


1,準備大量「薑絲、蒜頭、蔥頭」,先用油爆一爆香


阿媽燜雞最主要其實就係「豉油糖酒薑蔥蒜」咁多,但係就係咁簡單嘅材料,燜出嚟嘅雞已經好好味。。。


 



 


2,將已斬成件嘅雞塊(阿媽驚我唔識得斬雞,先幫我處理好,洗乾淨斬好先至俾我㗎,世上只有媽媽好啊),先放落鑊炒至表皮轉白色,略熟幾成之後,落黑糖,酒,生抽老抽,兜炒至色均。(落白糖都一樣,只不過我鐘意用黑糖,覺得香啲)



 


3,加水燜,因為雞肉本身會出水,同埋落得水多會衝淡鮮味,所以我只不過落佐一細細碗仔嘅水,然後蓋埋蓋,燜十五分鐘。


4,十五分鐘之後,再將清理好嘅粟子倒入,一起再燜多十分鐘。



 


5,二十五分鐘之後,開蓋,放落大落蔥段,開大火炒至收乾水即可~~~~


(我無額外落鹽,因為生抽老抽本身已有咸味,老抽落佐個色水會靚好多㗎,老抽唔好落得太多,因為一收乾水之後,個色澤就會變濃好多)



 


一大煲嘅栗子燜雞,夠我啲食兩三餐啦~~~~


本嚟打電話俾表姐,係想叫佢兩公婆收工後過嚟食飯,咁大煲雞,大家分享會開心好多,不過表姐住東涌,收工後太遠,又懶得過嚟囉,咁佢無食神啦。。。



 


勁開心嘅係,我整得好好味,而且最主要,我整到完全係阿媽整開嘅味道添㗎。。。。。


阿媽,你後繼有人啦。。。



 


咁又買佐盒豆苗,本嚟又係諗住滾湯嘅,不過睇到雪櫃總有兩塊煙肉,咁就轉成煮餸啦。


材料:豆腐切細粒,煙肉同蒜頭佐香料,一盒豌豆苗洗凈。



 


做法:將煙肉同蒜頭爆出香味,倒入豆苗略炒,倒入雞湯,倒入豆腐,由得佢慢慢浸住煮熟,等啲味滲入去,落少少少少鹽俾味。



 


一碟好好味嘅上湯浸豆苗就整好啦。。。。



慘劇發生

死人冧樓,多數係用嚟形容某件事之大所用,通常只係作為比喻出現係生活當中居多。


四川大地震,死人冧樓事件,多不勝數,雖然感覺難過,但始終離我啲生活範圍較遠,果種震盪嘅感覺,稍縱即逝。


但係尋日紅磡發生嘅冧樓事件,就發生係離我不過二十分鐘車程嘅地方,睇到電視新聞嘅報道,感覺猶其強烈,感受猶其深切,睇到電視畫面嘅搜救行動,睇到受難者家人的悲慟,自己都不其然地感同身受。


慘劇經已發生,最希望嘅係災後嘅人,可以得到妥善嘅安排,令佢啲後續嘅生活得到保障,香港有能力去對千里之外嘅受災人士做出緩助,希望都會對發生嘅自己本地嘅災民,做出妥善嘅幫助。


由新聞中得知,依次慘劇當中嘅住客多數為租客,所以就算尋得責任方獲得賠償嘅,應該都係業主本身,我唔知對於直接受災嘅租客,可以獲得點樣嘅賠償,亦都唔知業主有無為樓宇購買保險,對於後續嘅安排,繼續保持關注。


29 1月, 2010

兩餸一湯--豌豆苗豆腐湯、蒜苗炒肉片、蒸豆腐

我返嚟啦各位山頂嘅朋友~~~


帶住超勁鼻塞,超強咳咳返佐嚟啦。。。。


睇過醫生,食過藥,已經好返好多啦,不過夜晚瞓覺都會有幾聲咳,吵到枕邊人,真係辛苦佢啦。。。。


鼻水多多,凈係想食清淡啲。所以買佐大大兩舊豆腐返嚟。嫩豆腐。


買佐一大舊梅頭肉返嚟,切佐少少比較肥嘅位置出嚟,剁剁剁,剁佐一細細舊肉碎出嚟。


然後用豉油糖生粉麻油較好味,再落鑊炒至斷生。


豆腐切一舊舊仔,過一過熱水,去佐豆腥味。


最後將炒好嘅肉碎擺上豆腐度。



本嚟係諗住豆腐煮肉碎嘅,不過食過感冒藥之後勁眼瞓,四點幾嘅時候,諗住上床同周公子傾幾句,點知一傾,就傾到天都黑埋,老公俾電話我話收得工返緊嚟,閉,飯都未煮,咁就為有蒸飯最快熟,咁諗住蒸得飯囉,不如豆腐都用蒸嘅方式去做啦。


 


咁就係咁易,飯蒸好之後,再將豆腐擺入鑊,蒸多五分鐘,搞掂~~~



 


食之前淋少少蒸魚豉油,炒肉碎本身已經有少少油,清清啲,咁樣食,真係好食得到豆腐本身嘅清香。


同埋我固執地認為,豆腐同蔥嘅味道最格,所以蔥大量落都唔怕㗎。。。。


因為蒸嘅時間好短,所以蔥我都係一起落鑊蒸埋,咁樣食落個蔥似乎香啲同安全啲。。。。



買佐扎蒜苗,似乎好少,再切埋少少甘筍片。


一舊梅頭豬肉,切片,用大量薑絲,酒,豉油糖生粉水醃入味。


先落油爆一爆蒜苗同甘筍,然後撥過一邊,落肉片炒至變色,然後再將蒜苗同肉撈埋炒落鹽調味,入味就可以裝碟。


肉片好易熟㗎,所以唔洗加水加蓋去燜,自細阿爸就教落,炒肉片最好最好就係唔要落水去燜,就咁煎香煎熟佢,咁肉片先至可以保持佢嘅鮮甜,一加水就衝淡佐肉嘅鮮味,所以我炒依味餸,係完全無落水焗佢㗎,醃嘅時候可以加多少少水去醃,咁炒嘅時候個肉片就滑啲同埋唔會鞋。



依碟餸雖不起眼,但係肉片好滑,好香,好惹味㗎。。。。


強哥就贊「好鮮好滑嘅肉片,好惹味」


 


「不過,我因為鼻塞,試唔到味,食嘅時候鼻通返少少,一試,閉,個肉片咸佐少少添,哈哈哈」



簡單地用豌豆苗同豆腐肉片滾佐一個好清但係好甜嘅湯水



 


全部材料都係好易切好易洗,炒嘅時間又快,幾分鐘搞掂,所以半個鐘左右,就整好餐飯,真係話咁易啦。。。。



開飯啦~~~



 


 


10 1月, 2010

蒸飯

之前一日,用佐大半邊嘅雞整雞煲,凈返嘅細半邊,提早一日,抹一層鹽焗雞粉係雞度,醃佐一日一夜。


第二日,蒸飯


蒸飯,生米煮成熟飯嘅其中一個方法,只不過唔係用電飯煲煮,而係用個碟,將生米浸住水,擺上鑊隔水蒸熟嘅步驟。


水同米嘅比例按電飯煲煮飯用嘅水量差唔多,因為唔同嘅米食水量唔同,蒸一次,覺得太腍咁下次落少啲水,如果覺得蒸出嚟硬佐下次就落多啲水。


洗好米,添水入碟,然後隔水中火蒸二十分鐘,熟佐之後唔揭蓋焗多十分鐘即成。


蒸飯係咁簡單,比電飯煲煮總要快,煮得米少蒸飯最適宜,口感比電飯煲整總要好。


 


咁蒸飯嘅同時,順手蒸埋果邊半雞。


我係等飯煮佐大約十分鐘左右,收佐水,再揭起個蓋,擺雞上去碟飯度㗎。


舖多幾片薑,蒸多二十分鐘,搞掂。。。。。



 


就咁簡單咋,除佐要落夠水,其它乜都唔駛理啦。。。



 


最正係底下碟飯,縮佐雞汁嘅味道,加埋薑嘅味道,好正啊。。。



 


我其實唔係太識斬雞,都係斬過幾次咁大把咋,不過一次比一次有心得,相信下次會斬得再靚啲~~~


碟雞細細一碟,三幾下搞掂~~



炒多碟生菜,依家嘅生菜真係多汁又清甜,食多啲菜無妨~~~



 


嚟緊半個月會外游,所以要清佐雪櫃啲食物,早幾日打邊爐食凈半邊蘿蔔,加埋少少牛肉,一大匙味噌,滾佐一個簡單嘅湯水。



 


雖則簡單,但不失美味~~~



 


要消失一段時間啦,等我返嚟,再煮過絕對食肥人嘅餸菜俾大家睇啦。。。。


不過,可能突然一日,覺得要開始食素,都未定㗎~~~


09 1月, 2010

自家制笠笠雞煲

阿媽整雞煲味道一流。雖然好耐無食過,不過問佐做法,買佐隻雞返嚟自己又試整下。


係Taste買隻所謂龍崗雞,四十幾蚊大大隻,味道肉質都勉強可接受,都叫抵食,叫店員代為幫手斬開兩邊,半邊留返第二餐,另半邊,返到屋企自己斬成一舊舊,整雞煲。


一餐兩個人食半邊都差唔多啦。


斬好嘅雞件,先用一大匙「柱候醬、豉油、糖、酒、薑絲」醃十五分鐘。唔駛醃好耐㗎,所以就算收工前去買返嚟都來得及整㗎。



 


配料方面,我就用佐「蒜頭、紅蔥頭、薑片、青椒、花椒粒、辣椒乾」


少少邊爐食凈嘅香菇都切埋加埋。



 


因為我會一邊開住爐仔熱住食,咁就唯有用依款可以上得電磁爐嘅紫砂煲嚟整,直接就用依個煲整,整佐又係依個煲食㗎啦。少洗好多煲碗碟,幾好。。。。


做法:


1,先用油,爆一爆啲花椒粒,等油入邊都有花椒味。


最好慢火爆,咁啲味先至會出佐嚟係油度。



 


2,倒入青椒同香菇都爆一爆香個表面,撈起備用。


3,倒入蔥頭同蒜頭,爆至略為焦黃。



 


4,倒入醃好嘅雞塊,唔好落水,開最細火,慢慢就咁乾焗佢



 


我會蓋埋個蓋慢慢火焗大約五六分鐘



5,睇到雞肉大部份轉色,咁就倒入一大匙自制嘅「混醬」


混醬由「豆豉剁碎+花生醬+沙爹醬」組成。


倒入混醬,落幾大湯匙水,撈勻佢,再焗十分鐘左右。


因為雞肉自己本身會出水,所以唔駛擔心,落太多水煮到個雞濕淋淋就唔好食啦。



 


6,我會係煮好之前,放落一大匙新鮮磨嘅花椒粉增加香味。


然後,食嘅時候,將雞煲擺上電磁爐,開住細細火慢慢食。。。


食之前,掉一大扎荽莤落去,香噴噴。。。。。。


咁凍嘅天氣,咁樣一煲暖笠笠嘅雞煲,真係邊個可以抗拒~~~



 


食到咁上下,落少少少少雞湯,愛嚟碌生菜,生菜縮佐雞煲嘅味道


正~~~


加埋一大碗白飯,無得頂啊~~~



08 1月, 2010

全齋邊爐餐

元旦果日唔小心將之前嘅心血全部付之東流,我承認自己係一個好固執嘅人,所以連接住嘅幾日,都係咁打機打機打機,係要追返之前嘅進度,反而因為咁全情投入,依次用佐四日咋,咁就俾我爆佐機啦。。。。


好空虛啊~~~


胡須佬叔叔終都救返公主。。。。



從此二人,就可以過著美滿幸福嘅生活啦。。。哈哈哈。。。。


我依幾日一起身就開機,玩到下晏三四點先去買餸,然後求其煮好食飯,晚上煲電視就唔得閒玩,第二日早起身又再繼續,雖然一日都只係玩半日,但係竟然尋晚發夢都夢到自己帶住個竹蜻蜓,係咁曉得飛下飛下添,幾搞笑啊。。。。



依幾日都係煮最簡單嘅餸,星期一晚叉燒河,星期二餐蛋面,星期三煮佐個豆卜讓魚肉伴西蘭花,用蠔油打個芡汁俾味,一個餸咋。。。。



 


星期四,天凍凍,打邊爐。


買佐盒菇菇。。。好滑~~



 


星期日邊爐凈抵半盒芋絲



 


荽莤豆腐



 


甜粟、蘿蔔、蓮藕



 


大大一扎西洋菜。。。起碼有兩斤重。。。


我係第一次自己買西洋菜食啊,原來西洋菜咁嫩㗎,洗嘅時候輕輕一掂到佢嘅玉體,就即刻「卜」一聲斷兩截,洗嘅時候已經知道實係好嫩口㗎啦,果不其然,真係好嘢,食落完全唔起渣,好清香,下次會再買嚟炒,都實係好好味。。。。。


我一直以為西洋菜凈係愛嚟煲湯㗎。。。。不過我都未煲過西洋菜湯,下次要試下。。。。



 


滾佐個蘋果甜粟豆腐紅棗湯底。。。。



 


總有包炸支竹同粉絲未影到相,依次打爐,全齋。。。。


食得好舒服。。。。。


 


第二日,去廁所,總舒服啊。。。。


 


 


 


01 1月, 2010

2010第一日,無出街,全程自己煮

Happy new year~~~


真係話咁快就到佐二千年之後嘅第一個十年。


唯一嘅願望就係屋企人身體健健康康,自然其它都會開開心心!!!


-------------------------------------------------


 


新年第一日嘅早餐,十二點半開始。


一餐用嘅醬汁,成檯都係。。。。。。



全部係即食品。


熱狗包、意大利辣腸,焗爐焗返熟腸仔,加埋自製惹味醬汁,熱狗包焗返熱。


加埋奇妙醬同芥辣醬伴食,正`~~`



 


叮叮食物,無用微波爐好多年,咁就隔水蒸。。。。。。



 


一個唔駛用腦,又好好味嘅早餐、中餐、下午茶餐~~~



 


新年快樂!~~~~


-----------------------------------------------------


原本計劃係出街睇部戲,然後拖手仔行街市買餸返歸打邊爐。


但係一時手痕開機打一陣wii,點知一打就唔捨得離開,老公亦都樂得開始佢嘅魔獸生涯。


如果我唔手痕咪好囉。。。。。


如果我小心啲咪好囉。。。。。


喊!!~~~!狂喊~~!~~·


我辛辛苦苦打佐個幾月嘅一個game俾自己死咁蠢,一個唔小心,全部save都無曬,全部嘅心機全部嘅積累,都俾自己erase曬。


就嚟爆機啦嘛!果下先嬲啊~~


如果出街咪好囉~~~~~~


好-鬼-心-痛!!!!!


總要扮好大方咁同老公話「無有怕,新年一切由頭再開始,本小姐由頭再嚟過」


--------------------------------------------------


無心機啊,煎個雞批。


醃佐幾個鐘嘅香料。



印尼煎雞批



 


倉有印尼撈面。


煮佐三包。



 


醬汁雖多,加埋自己嘅沙嗲醬,再香多啲。



 


三包面,大大一碟,無心機食。。。。。。


扒兩啖食唔落,心痛。。。。。



 


老公搞掂。。。。