小菲菲俠自煮樂

31 8月, 2010

住家小菜---香菇燜排骨(食譜)

上星期某個晏晝。
切佐少少魚片,加埋包菜,青椒與甘筍(家中長期後備物資),亂七八糟的一大堆,俾啲蠔油較味,炒佐碟小菜,做為午餐面食的配菜。


其實家中炒餸,絕對無一個約定俗成的規則需要遵循,最重要係家中有些什麽材料,就隨意地搭配著炒上一碟,而重點主要在於調味的運用,就算是同樣的幾份材料,變換著使用不同的調味品,相同的材料配搭,也會產生絕對不一樣的味道與感覺。


而材料的搭配,需要有一個主角去做為中心點,通常我會以肉類為主角,然後搭配啲味道不甚突出的蔬菜類,並且盡量挑選一些色澤豐富,味道不會太突出的材料去搭配,咁樣無論是視覺或是份量的效果會更豐厚。



碌佐個面做主食~~~


老公自己食,我晏晝多數食生果代餐~



有幾日稍有涼意。


一涼就有「肉望」,咁就整燜個排骨嚟食啦。


材料:


“大醬一大匙、洋蔥適量、香菇適量、生蒜幾瓣、炸蒜粒一湯匙、醃好味道的排骨適量”


排骨我用佐“生抽老抽糖酒大醬生粉”去醃入味。


以前我覺得,既然係要去燜的排骨,燜嘅過程一樣會入味,就唔需要額外再經過醃入味依個步驟了,但係經過幾次的嘗試,發現先醃一醃入味的排骨,再燜煮的過程,會更好味呢。




炸蒜係得閒的時候,自己剁碎啲蒜頭,放進油鍋裏慢火炸至金黃備用的。


自己炸可以保證唔會有油膩味,出邊買現成嘅,係用翻炸多次的油,點都會有一股不好的味道。


平時食面或煮煮餸,加埋少少落去,成道餸的味道都會有不一樣的感覺。



因為顧著打機,時間一下無發覺就到佐強哥收工的時間,趕唔切慢慢煮了,同時開兩灶頭,同時開工吧。。。。


蒸飯用佐一個鑊,懶得另外拎個大點的鑊出來,所以燜排骨就直接用佐平時煮早餐的細隻平底鑊去燉。。。。


事實證明,有時都係咪偷懶,細隻鑊燜排骨,翻炒材料的時候,好痛苦,要小心地翻炒,一個唔小心材料就會翻出外了。



做法:


1、落少少油,先將蒜與洋蔥翻炒出味道


2、將香菇加入去,一起翻炒至表面焦黃,然後將所有材料取出


3、原鑊俾少少油,將排骨翻炒至顏色轉白。


4、加水,加一大匙的大醬,少少糖,一湯匙的炸蒜,蓋上蓋,燜20分鐘左右。



加大醬係因為喜歡大醬的豆香味,比豉油的豆味更為濃郁,因為排骨已經醃過味道,所以不需要額外再加其它的調料去燜排骨,燜好後的排骨,可適當按各人口味,覺得淡佐可再加些鹽。
我哋食得比較淡,所以我覺得味道已經足夠,就無再加其它的調味了。


加佐洋蔥,有佐一種天然的甜味,所以糖需要落少啲。



一於就懶到底啦,直接原鑊搬上檯開食~~


洗少隻碟添~~~


留返多少少汁,因為醃排骨有少少生粉,所以啲汁好結,愛嚟撈飯好正㗎~~



加埋隔夜冬瓜湯,一餸一湯一碟飯,搞掂~~



30 8月, 2010

糙米茶(食譜)

依排開始飲糙米茶,糙米係未經過深加工嘅原始狀態嘅米粒,凈係去除佐外層嘅谷殼,而保留佐米嘅皮層、糊粉層和胚芽,所以較之平日食開嘅白米,佢會較為硬身。


買開雜糧果間舖頭,有分短身同長身嘅糙米,其實買咩形狀無乜區別,係糙米就得啦,我就買佐長形嘅。



整糙米茶極簡單,細細火,將糙米擺入鑊度,慢慢炒到米色轉微黃,可以聞到淡淡嘅米香味即可。



因為係未洗過就直接落鑊炒,所以我會先過一過清水,洗去表面嘅塵粒。



然後將炒好嘅糙米,擺入容器度,再衝入適量嘅滾水,焗五分鐘左右,可以濾走啲米,凈返嘅水,就係糙米茶啦。


係咪好簡單咧~~~


同平時衝茶飲步驟係一樣嘅,只不過將茶葉,換成炒香嘅米~~~


同埋總有一個民間小偏方,如果小朋友肚瀉,可以將平日食嘅白米,又係咁樣落鑊炒一炒,轉成淡淡金色之後,加水煲成粥,炒過嘅米再煲成嘅粥俾小朋友食,可以好快止到肚瀉㗎~~~



衝完茶嘅糙米,可以同白米一起,煮成糙米飯~~~


一啲都無嘥料㗎~~



因為糙米茶嘅利尿效果極強,所以有人話,飲糙米茶有極好嘅減肥作用,其實依個隻不過係減肥嘅輔助作用,並不能完全達到減肥效果。


但係糙米茶有極佳嘅通血管,清血脂嘅功效,就真係好值得參考,現代人食食埋埋咁多肥膩嘢,高血壓高血脂依類病,已成為普遍嘅現代病,我啲總要防患於未然,所以平日飲下糙米茶,當係預防下,都幾好㗎~~~



且不說功效,佢本身衝泡出嚟嘅味道,帶有淡淡嘅焦香嘅穀米味道,就好吸引人,細細品味,滋味都無窮㗎~~~


味道極似大麥茶咁嘅味道~~


27 8月, 2010

住家餸---瑤柱冬瓜湯+孜然肥牛炒薯仔

自細就要阿媽逼住先會飲幾啖湯水,習慣直到依家都無改過。對湯水係可有可無,成日都唔記得煲啖湯水俾老公飲添,尋日突然良心發現,咁就煲佐一個最簡單嘅湯水俾老公。


「瑤柱數粒、意米一碗仔、杞子數粒、薑二片、冬瓜一大舊、豬骨一斤、水一煲」


豬骨飛水後所有材料掉哂入煲係咁煲。。。。


可能太耐無飲過冬瓜湯,咦,覺得飲湯都幾舒服啊。。。



 


屋企凈有一個薯仔,半個洋蔥,一截甘筍。


咁就係樓下買佐盒肥牛,配搭住炒味餸啦。


以前食過用孜然炒羊肉嘅餸,同強哥都好鐘意,咁無羊肉買到,就將羊轉成肥牛代替啦。


做法:


1,肥牛用「生抽、老抽、糖、酒、孜然粉、辣椒粉、生粉」醃一個鐘入味


2,凈鑊落油先爆香洋蔥,然後倒入甘筍同薯仔略炒,落少少水燜熟,俾少少雞粉調味,然後盛起備用。


3,原鑊倒入肥牛猛火快炒至熟。


4,將炒熟嘅配料全部倒入,同肥牛炒勻,熄火,撒入一大扎荽莤,同一大匙孜然粉,用餘溫將味道焗出嚟,裝碟~~~


(荽莤同孜然一定要熄火後再落,因為太熱啲香味就揮發減弱)



無乜點落過油,因為肥牛本身會出好多油,再落就會覺得好肥啦。


肥牛加埋孜然,洋蔥同荽莤嘅香味,混雜之後,有一股莫名的吸引力,非常美妙~~~


極惹味極好餸飯嘅一味餸菜~~~



一個飯一碗湯一碟餸,一個晚餐~~~



 


屋企每日消耗最多嘅係生果,食生果多好啊,第二日去廁所都暢快啲,咁皮膚都會靚好多㗎。。。



 


 


26 8月, 2010

一日兩餐之住家飯餸

同豬肉佬話要炒嘅瘦肉,咁佢就俾佐一舊肩頸附近嘅肉俾我。


依個部位啲炒愛嚟小炒最適合,好爽,唔會梅。



醃豬肉鐘意食自細食到大嘅味道


「蒜蓉、薑、老抽生抽、糖、酒、生粉、油」


去醃。



依日買佐幾兩嘅辣椒,叫「杭椒」,係青椒眾多品種之一,佢較細長形,好辣,表皮較硬,台灣有一款小菜叫「剝皮辣椒」,就係用依款辣椒嚟整,炸過之後面果層皮可以倒數剝出嚟,係街市偶見一檔有售,即刻買返嚟配搭住炒餸。


貪佢辣味較重,配菜好惹味。



晏晝強哥如果係公司做嘢,都會返屋企食飯。


依日晏晝,就用少少甘筍、青椒、子薑,加埋醃好味嘅肉片,炒埋一細碟仔俾佢食。



辣辣哋,加埋甘筍嘅爽脆,肉嘅香,一啖咬埋,好滋味~~~



我晏晝通常唔食嘢,凈係淥個面俾強哥就可以~~


淥面永遠唔洗擔心會滾瀉出嚟嘅方法,係用平底鑊去煮面,開幾大火,都唔洗驚會撲出嚟~~~



一碟小菜,一碗面~~



講完晏晝,講晚上。


又買佐一個南瓜仔。


不過依次嘅南仔仔較熟,內邊已經有少少變黃色,同埋口感已經好接近成熟嘅南瓜~~~



加埋晏晝醃好嘅肉片,加啲甘筍,木耳,炒埋大大一碟~~~~



因為係屋企慣佐,開飯必定有三個或以上嘅餸,就一路覺得,食飯要起碼三個餸以上先叫標準,所以煮一煮都幾個餸,屋企得兩個人,食就食餐慒,搞到胃口又大佐,肚腩又大佐,覺得咁樣好唔掂,咁就試佐一排,少肉多菜,一飯一味餸,其實只要餸菜搭配得宜,味道惹味,一飯一餸,都可以好滿足㗎啦~~~



 


 


25 8月, 2010

早餐之---度身訂造蒸熱狗包

情緒未完全回復,睇到相關新聞,依然都會覺得個心扯住扯住,情緒一直好低落,不過都好清楚事情已經發生,再去抱怨或者怪責都於事無補,只能夠祝福倖存落嚟嘅人,以後嘅生活,要更加堅強!


睇過台灣新聞先知,原來由十年前開始,台灣就一直都無安排去馬尼拉嘅旅行團,因為經過風險評估,覺得果度嘅危險性太高,所以通常台灣只有去宿霧等地嘅團。


反而係香港完全無依方面嘅風險評估,咁以後出行,真係要自己去做出相應的風險評估再決定行程。


---------------------------------------------------


尋日提早整佐啲包包,今日早餐,配埋腸仔,一個中式腸仔包做早餐~~


依款包包,做法中西合璧


材料「高筋麵粉,牛油,砂糖,酵母粉」


做法:


1、先用一部份面粉同發粉同暖水開稀佢,大約五分鐘,等佢發酵變多,咁就可以倒入麵粉同牛油度一起搓。


2、同整饅頭唔同,因為要整得包包鬆軟啲,所以落佐好多水份,水係多到好痴手,要不停「搭」嚟搭去,搞到麵團起筋出薄膜,最後搓至成形為止。


3、成形嘅麵團等佢係室溫度發酵半個鐘,變倍大之後,就可以分割,再造型,最後等多五分鐘,就可以上籠蒸十分鐘左右即成~~


(其實就係整面包咁整,只不過最後唔係入焗爐,而係上籠蒸的區別而已)



真係度身訂造嘅包包㗎,同個腸仔差唔多大㗎~



整多幾隻,蒸好後可以擺入雪櫃,要食之前再蒸返熱佢。



今日早上,就要兩個包包,隔水蒸返熱佢。


熱辣辣,軟泡泡,香噴噴,好似剛剛蒸出嚟咁㗎~~



再整多兩條腸仔。


腸仔要保證佢熟透入邊,所以我會先用少少水煮一煮佢。



焗一焗佢二三分鐘~~



倒走多餘嘅水,然後落少少油去煎香表面。


因為要配住包包食,所以我額外落多少少「老抽+黑糖」,老抽係偏甜味同香濃啲嘅,完全唔會太咸,加埋黑糖炒一炒過,再痴到腸仔身上,個味道同感覺,會完全升級到另一個程度㗎~~~



處理好嘅腸仔,夾入蒸得軟綿綿嘅白包度,再落多層自制嘅XO醬,面再俾多少少茄汁或者奇妙醬,就係正到不得了的一個早餐~~~


因為包包整得好鬆軟,又係蒸的關係,食起上嚟,可以食到香噴噴嘅麵粉嘅味道,加埋煎得香噴噴嘅腸仔,我覺得比起超市嘅熱狗包,絕對有過之而無不及。



一杯咖啡,一碗麥皮,一個腸仔包,一個完美的早餐~~



尋晚因為有蒸包包,所以晚餐跟手用返同一個鑊,蒸飯,蒸埋一碟梅菜蒸肉餅,一個晚餐又簡單又美味~~



 


 


23 8月, 2010

一日兩餐之快手早餐+無難度小炒篇

早餐一杯咖啡同一碗麥皮係固定節目。


發覺煮過嘅麥皮口感較即衝果款要好得多,所以通常都會選擇煮一煮再食,極簡單,將奶同麥皮混合好,擺上電磁爐,500度火3分鐘,設好時間,過程完全唔洗去理會,完全唔會潑瀉,3分鐘之後一定搞掂~~~


煮麥皮嘅時候可以去準備其它食物。



剪兩個滑蛋,兩塊火腿,一個三文治其實真係好容易~~



10分鐘之內絕對可以搞得掂嘅早餐。



晏晝簡單地炒一款小菜。


奶奶手打嘅墨魚丸,加埋青椒同甘筍。


調味係「蒜蓉同黑椒汁」


建議用圖片所示嘅兩款佐調味,出嚟嘅味道好香~~~



炒嘅時候再落多少少蠔油,唔洗落鹽,炒埋一碟好惹味嘅餸~~


無任何技術難度,就咁簡單~~~



 


早餐另一選擇,都係方包,不過轉成厚切方包~


方包先焗一焗熱,擦牛油,再焗一焗入味,然後擦蒜蓉同香草,再返焗一下下~~~



 


脆卜卜嘅厚切牛油蒜蓉包早晨全餐~~



晏晝小炒材料有「薯仔切絲、青椒炒絲、甘筍切絲、香腸切片」


調味用佐「蒜蓉同老乾媽豆豉醬」



全部炒埋,俾少少鹽調味,又係無乜難度嘅小炒~~



早餐又係厚切方包,內容除佐牛油蒜蓉,加多一款粗粒花生醬做選擇~~~



晚餐係屋企食,蒸碟飯,用肥牛加包菜甘筍,少少燒肉汁炒埋大大一碟~~~



蒸飯嘅時候蒸多兩個咸蛋,一個晚餐,又係無乜難度搞得掂~~



另一日晏晝。


最鐘意將啲凈低嘅料加加埋埋炒做一碟~~~


加佐少少榨菜同炒,原來可以咁有味~~~


下次炒齋菜嘅時候,可以用啲啲榨菜去吊味~~



惹味又簡單尼~~~