小菲菲俠自煮樂

31 3月, 2011

兩 餐

表姐尋晚收工之後嚟我度幫佢整下電腦,咁晚飯就留佢係我度食埋先返屋企啦。


買佐隻走地雞,整佐碟香菇燜雞。


知道表姐嚟食飯,所以中午已經提早先炒好碟餸,咁留到晚上再返兜熱佢,會入味好多。留佐一盒出嚟,俾表姐帶返屋企,第二日可以炒返熱同表姐夫食。


表姐一食到就話「咦,你都學到姑姑煮餸嘅味道了喎」


表姐口中的姑姑即係我阿媽啦,阿媽係親朋戚友中間煮餸好味人人都知啦,哈哈,表姐話我煮嘅味道似阿媽喎,即係贊緊我煮餸好味啦,真係開心~~



炒多碟菜~~



凈有一個蕃茄一條青瓜,學似之前一日煮牛丸咁煮,不過將牛丸轉成蛋~~


一樣清爽開胃~~


蒸多碟肉餅,蒜蓉蒸肉餅,係表姐嘅嬤嬤,即係我婆婆傳落嚟嘅味道,俾表姐回味下~~


一餐住家飯,比出街食要溫馨得多啦~~



表姐第二日要帶飯返公司食,樣樣裝啲,裝佐滿滿一盒飯餸,等佢食飽飽~~


食到我用五常米煮嘅飯,連表姐都忍唔住要影抵個包裝,返去都要買返包嚟食,真係好好味㗎~~



強哥尋晚開夜做到好夜先瞓覺,所以今日俾佢瞓遲啲,起身後,都就嚟晏晝了,咁就煮多啲,早餐晏晝一齊食。


蒸包燒麥,煮個公仔麵。



尋晚食凈有少少飯,咁就用欖菜炒佐個腸仔飯。


強哥話「似生炒糯米飯咁」~~~


個米炒飯,都一樣咁掂啊~~


一般的東北米,多數似日本珍珠米,又肥又短身嘅,反而依款東北米,比較長身,不過又比泰國米較為粗身,好特別。



一碟炒飯,一碗麵,衝多壺茶,舒舒服服~~



 


30 3月, 2011

蕃茄煮叮叮牛丸

兩條脆肉瓜,切好後,超大一碟。。。。


加埋少少木耳同肉醬,一起炒做一碟。



加加埋埋,炒好後,超大一碟。


清清哋,好好味,不過太大份,最後都係食唔哂,嘥佐少少添。。。



屋企無用微波爐好多年,不過叮叮食物,雪櫃總是有儲備的。


叮叮食物,除佐就咁凈食,其實稍加配搭,一樣可以入餸。


其中一款牛丸,配搭「青瓜、蕃茄、蒜蓉」,已可煮出一味極惹味的餸菜。



做法:


1、牛丸解凍之後,落少少油係鑊,稍稍煎一剪至表面香脆,另置碟待用。



2、蒜蓉與蕃茄倒入鑊,趁熱炒散。


     (蒜蓉唔洗用油爆出香味,因為我覺得生蒜比較能帶出蕃茄的味道)



3、將蕃茄撥過一邊,少少油炒軟青瓜。


     (青瓜略炒即可,炒耐就失去青瓜的爽脆感)


關於青瓜,我會先打斜切片,然後再豎切成條,咁樣切法,青瓜就會兩頭都帶有皮,咁樣炒好後會比較好地保持脆度。



4、最後將牛丸倒入鍋,下調味「雞粉、生抽、喼汁、砂糖」



強哥一食即刻豎起大拇指「超好味」~~~~



 


29 3月, 2011

米飯的選擇

咁多年,主要都係食泰國米。


早三年前嘅X象或X鳳,都尚能接受,不過近年超市嘅包裝泰國米,已被代理商用舊米溝到面目全非,同樣品牌,依家食落既無米應有的清香味,更無米粒飽滿油潤的香軟彈牙,而價格就同質素一路呈反比增長,只見價格加,就不見質素長。


所以一路會不斷嘗試市面售賣的米,自己溝米都試埋,為的就是能吃到滿意的一碗「飯」;而雜貨舖嘅米(特別係X鳳米)最新口感最好,無摻入舊米,直接原包裝直售,不過稍嫌大包佐啲,斷斤買又貴又麻煩,不過都係近年唯一的選擇。


通常泰國本地的米,一年會有兩次收成,而在中國東北的一個叫五常的地方,有一種叫「稻花香」的品種,一年只會收成一次,一年只能收成一次的米,相對的營養吸收會更為豐富,所以米粒會更加飽滿,想必都會更為美味。


前日在華X萬家,無意中發現原來本港都有五常的稻花香米,即刻買佐一包返嚟。


雖然舊年有新聞話,因為五常米較為優良,所以有無良米商,用普通東北米加埋香精扮五常米出售,不過新聞過佐成年咁耐,相信輸入本港的米必定有一定的檢測手段,並且「金X」依間公司有係本港上市,早前股東大會上,佢哋總向股東「派米」做禮物,表明對自己旗下品牌的米,幾咁有信心,所以我都好放心咁買嚟食啦。


我就以一杯五常米,半杯泰國(X鳳)米的比例溝埋一份,煮出嚟的飯,嘩,好掂啊。。。。


米香味實在而唔過份,好真實,口感更是粒粒飽滿而充滿油脂感,咬落粒粒分明而充滿彈性,又不失綿軟之意,係我近三年嚟食過最好味的飯,好感動~~~


我就覺得佢比日本米總要出色,而且佢價格實在是經濟實惠,綜合之下,實在係好優質的一個選擇,俾最近要換米食的網友,一個好好的參考資料啦。


後記:我有少少被之前食過一次的五常米影響佐,相較之下本港售賣的依款五常米,無內地另一品牌的五常米好食,下圖依款,過多一日,我無溝米,單獨煮熟的飯,口感略嫌綿軟,彈性不夠,粘性亦不足,不過,都不失為一個溝米的選擇。


再後記:再後嚟,單煮依款米嘅時候,我比平日泰國米的用水量再減少啲,原嚟依隻米的食水量不大,所以水要相對的落少一些,咁樣就可以煮到又彈牙又軟的飯啦,就咁睇,無需溝米,都可以煮到碗好好嘅飯啦。



好飯配好餸。


好餸的定意並非山珍或海味。


自細食大的味道,先係最珍貴的美味。


整個「菜脯煎蛋」


蛋適量,蛋入邊落少少油,少少少少雞粉,菜脯剁碎,倒入打散蛋液里。


就咁簡單。



鑊燒到極熱之時,倒入薄薄一匙的油,然後轉一轉鑊,等油均勻地分佈在鑊邊。


然後倒入蛋液,轉中火,唔要急住翻蛋,等蛋底略熟,一凝固之後,就自然會同鑊分享,形成物理性的「不痴底」效果。



煎到略帶金黃色的蛋,最香最美味,而且完全唔會痴底。



送飯一流~~~



炒多碟白菜,用花椒爆香油,然後倒入少少辣椒絲同蒜蓉,跟手倒入白菜猛火炒軟,加入肉醬,俾鹽調味,裝碟`~~


好惹味嘅炒白菜~~



我可愛的強哥,每個月會固定拎五百蚊散紙出嚟擺入佢嘅一個小小膠盒,佢話依個係玩具基金儲備,只要儲到一個數量,就可以隨意買幾樣小玩意,心理上會感覺,係多餘之物,咁買起玩具,就唔會覺得有犯罪感啦。


周日同強哥去行佐下街,睇到依家電視真係超平,二千蚊都唔洗,已經可以買到一部「內置高清盒、22"LED屏、Full HD、8G電視錄影」等功能。如果早幾年,點可能用咁平價買到咁好嘅機㗎。所以同強哥二話不說,即刻從玩具基金度撥款,搬佐一部返嚟,好彩書房強哥裝修時都有預接駁好一條TV線,所以,電腦一左一右,電視企中間,同強哥可以一邊上網,一邊睇下電視聽下新聞,一心多用,真係妙~~~


同強哥對於生活的要求唔係好高咋,可以一直同處一室度過消閒時間,已經好滿足好開心啦~~~



28 3月, 2011

肉醬篇之--芝士肉醬焗茄

好鐘意食肉醬,普通平凡的餸菜,加埋少少肉醬,無論賣相抑或味道,都即刻獲得提升。


罐頭肉醬味道雖好使用方便,可惜防腐劑過多,不宜常用。


所以經常會自己炒定少少肉醬,伴麵炒餸,隨時加埋一大匙入去。


肉醬做法好多,今日同大家介紹一味,我整得最多嘅做法。


先睇下材料:


「蒜蓉、紅蔥粒、乾辣椒絲、花椒粒、薑蓉」



做法:


1、落少少油,爆香花椒,然後將炒過嘅花椒取出棄置。


2、原鑊,落紅蔥頭蒜頭同乾辣椒絲(乾嘅辣椒絲經煎炒之後會有特別嘅香味,與新鮮辣椒的味道截然不同)


3、將上步驟炒好的香料撥埋一邊,原鑊倒入免治豬肉(豬肉完全無需醃制)


4、中細火炒至豬肉散開,顏色轉白,油逼出嚟即可。



5、然後將薑蓉倒入,落一大匙麵豉醬(我用韓國大醬,味道類似,醬香味濃)


6、將所有醬炒勻,無需落水,就咁乾炒,利用豬肉逼出嚟的油脂,炒出醬香


   (其實依個步驟炒好的肉醬已可以直接食用,可見再下一張圖)


7、因為果晚肉醬係要整嚟配茄子,需要有少少汁,所以我會落水去繼續煮醬


      (浸佐幾隻花膠準備煲鮮奶,所以隨手煎佐一塊掉入肉醬同煮,增加膠質)


8、煮大約十分鐘左右至肉醬較腍軟,最後埋個芡,搞掂肉醬。



 


睇下個肉醬,未落水煮之前嘅狀態,佢自己會有少少油逼佐出嚟,其實依個時候,肉同醬已經炒埋一起,就咁直接配麵配飯同食,都好好味啦。


早兩日看新聞,經常使用易潔鑊的女士,會因為進食佐涂層的脫落物,而導致婦婦更年期的提早發生,所以或是能夠不用,儘量唔好用易潔鑊煮食。


我用陽極鑊,煎蛋炒肉煎嘢,其實只要對火力控制得好,基本上都唔會痴底㗎~


個肉醬炒完,一啲都無痴底啊~~



肉醬部份介紹完,整好的肉醬,擺入雪櫃,可以擺三日左右,隨意配搭任何餸菜,增加味道。


跟住講下茄子。


茄子我會先用蒸鑊蒸五分鐘至熟。



茄子五分鐘左右其實基本已熟佐,如果覺得唔夠腍,可以蒸耐啲。


蒸好的茄子,對半切開,然後用刀係茄肉上劃幾刀,等茄肉略散開,然後將肉醬倒入茄子中間。



我鐘意啲芝士味,所以其中一條茄子,面舖一層芝士。


將處理好的茄子同肉醬,用錫紙包好。


擺上電陶爐,放係低架上,開1200火,焗5分鐘左右。



簡簡單單,連火都無需要睇,較好定時,熄火後,就焗好啦~~~


撒一扎蔥花,嘩,香噴噴的肉醬味已滲佐入茄子度,挾一絲茄子,配以一大啖肉醬,正到不得了~~~



而撒佐芝士嘅果一條,一如想像中的美味~~~


無電陶爐的網友,可以擺入焗爐同樣方式焗熟。


係咪好簡單咧~~~



最的,炒多個菜,一餐飯,話咁易~~~



大醬。總可以煮大醬湯。


不過實在太多,經常係未用哂已經要掉佐,好嘥~~



25 3月, 2011

菜炒菜之紅菜炒青菜

買佐薄一薄冬瓜一件。


同「杞子、圓肉、薑一細塊、排骨」


煲大半個鐘咋,唔係煲得好耐,出味就足夠,最後俾鹽調味。



有啖湯飲下~~


幾好㗎~~~



炒個菜。


甘筍絲炒椰菜絲,菜炒菜。


蒜頭蔥頭配料。


峇拉煎醬調味。



峇拉煎嘅香,菜嘅甜,炒埋,真係惹味到咧~~~


好好味~~~


今晚繼續~~~



表姐自製佐一批香腸,送佐幾條俾我試下。


一條青瓜切條,同香腸一起炒埋,一碟餸。



個香腸真係好掂啊。。。。


強哥食到贊不絕口~~


問過表姐做法,有機會我又要試下~~~



全家福~~



24 3月, 2011

蒜蓉肉餅、瓜仔肉、泡菜

極速煮餐飯有幾快?


「蒜蓉、肉、豉油、糖、生粉、酒」撈埋


上鑊蒸十分鐘,一個肉餅。



脆肉瓜炒免治豬肉,脆肉瓜炒得耐就唔脆啦,所以,炒三二分鐘即可~~~


因此,要切薄片~~



加埋就到期泡菜一樽仔,一餐飯,話咁快~~~


搞掂~~



試過好多款醃肉的酒,最後俾我發現,係華潤萬家可以買到下圖依款米酒,愛嚟醃肉,煮餸,味道真係一流,蒸出嚟的肉餅味道真係同街食到一樣。肉汁撈飯好正,不過好大一枝,我通常買一枝就會同阿媽分一半,因為酒用得少,有人分擔下,用得快啲。



 


22 3月, 2011

孜然、羊架、峇拉煎

一個細個薯仔、一截甘筍、幾粒紅蔥頭、一扎荽莤。


食羊肉依幾味配料最搭~~



羊架我會先用少少酒、孜然粉、豉油醃幾個鐘略有味。


然後落鑊煎至五成熟(兩面金黃)



羊肉自己會走好多油出嚟,所以我係就咁干煎。


跟住利用羊本身嘅油,爆香蔥頭。


然後將羊架撈起另置備用。



原鑊,俾少少油,炒甘筍同薯仔絲。


落鹽同孜然粉同埋少少辣椒俾味。



將羊架回鑊同薯仔炒勻,試味,若太淡,俾少少鹽較味。


熄火後,倒荽莤入去略炒,裝碟~~



羊架好滑好嫩,加埋孜然嘅香味,一流~~~


底下嘅薯仔絲吸收佐羊脂嘅香味,配以孜然嘅香氛,一樣咁好味`~



峇拉煎醬炒佐碟椰菜~~~



全家福~~~