紅燒圓蹄

雖然遲佐幾日，不過都係要同大家拜個年~~

祝各位網友身體健康，恭喜發財，龍馬精神~~~

送上一個紅燒圓蹄，祝天下所有人家，皆團團又圓圓~~~




整佐兩個，一個大的帶返奶奶度做節食，一大家人齊齊食，一個細的留在屋企同強哥慢慢享用。


自細屋企，逢家人生日，阿爸總會燜定一個紅燒圓蹄，意喻團團圓圓一家人，好溫暖。

我屋企燜圓蹄的方式好簡單，大概講下做法：

1、圓蹄出一出水，定型。

2、將圓蹄擺入鑊，落生抽老抽、冰糖、蒜二粒、八角一粒，一細碗仔紹酒，加水浸過圓蹄，開中細火煮一個半小時，最好開大火燜收汁即可。

係咪好簡單咧~~



圓蹄係豬腳最上果一截，提早叫豬肉佬幫我留起佐二個，磅好之後，叫豬肉佬幫我去佐中間果條骨，咁燜好就靚一靚啦 ~~

炒多碟白菜~~

唔算好肥，整體咁睇，瘦肉多於肥膏。

又未至燜到好爛，因為要保持少少肉質與皮膏的口感，燜得剛剛好火候，正到閉~~

係咪好鄙視我咧，食咁多肉~~~

唔會一餐食哂，咁罪過~~~

超好味，一年一次，算啦，無去諗咩肥唔肥，健唔健康的問題啦 ~~

真係，好好味~~

今晚，炒一個菜芯~~

開心的假期話咁快就過完啦，又要開工，加油，努力啊各位~~

炒菜

今朝早係公司開會， 下晝過西灣河果頭巡舖，凈係座車都大半日，唔覺唔覺，一日時間真係好快過。

去到間間超市都人頭涌涌，個個都趕住辦年貨，唔知係咪臨近過年，自己個心都無乜心機做嘢，天氣又好好喎，行係街頭，暖暖嘅風迎面吹嚟，真係好愜意。

行走係街度，知道目的地喺邊，去到目的地清楚要做啲咩，陽光與微風之下，不緊不迫地完成手上的功夫，感覺幾愉快~~


最後一站「天後」

行完最後一個場，睇完要睇嘅嘢，做完要做嘅事，可以自由活動。

就近順道入去維園轉佐一圈。

行個大運，出返嚟，夠。


過年其實極忙碌，要去長輩處拜年，要返奶奶度接待嚟拜年嘅人，總要應付中國式的熱情問候，譬如：

未結婚嘅時候被追問「幾時擺酒啊」
結佐婚啦，依然被追問「幾時生B啊」
就算生佐個B啦，都依然可以被追問「幾時追多個B啊」

係真關心？定係搵個看似溫馨的問候掩飾拜年時彼此的空虛？


極唔鍾意依類睇似關懷實情八卦的問候，最慘係，總要俾返一個

可以令彼此更好落台的回答，以維持表面上的熱鬧與親切，死未。


今年如果有人再問我「幾時生返個B出嚟啊」

我會答返佢「江湖傳聞2012世界未日，出年啦，如果出年大家都係度，咁就諗諗下啦~」

約佐強哥係佢公司附近見面然後一齊返屋企， 返到屋企，強哥洗米煮飯，我就摘菜洗菜。

夫妻同心，快手快腳，三幾下煮好餐飯。

馬拉盞炒油麥菜。




之前食凈嘅半煲鹵肉熱返佢，一個鹵肉飯加埋一大碟菜，咁就一餐啦~~

蒸魚、煎魚、一條魚

辛苦打了一大段的字，一個不小心，全部化為烏有。

罷了，還是寫寫吃的比較簡單。

今天強哥回奶奶那取蘿蔔糕，老爺給了一條勁大的倉魚帶回來。

我想吃蒸魚，強哥想吃煎魚。

索性一分為二，一魚整兩味。

蒜蓉豆豉咸檸檬為輔料。

一樣一點點。

剁碎之後撈在一齊。

再準備一個碗仔，一小匙生粉，一小匙砂糖，一小匙油，加一小匙清水，開好一個生粉水。

將剁好的蒜蓉豆豉與生粉水撈勻。

這個是獨門做法，加入些許生粉水，蒸出來的魚肉會較為滑嫩。




將撈好的蒜蓉醬舖在魚面。

水滾後上鑊蒸十二分鐘。

蒸好取出，傾走多餘的水，倒入些許蒸魚豉油，淋上滾油，搞掂。

蒸魚真係好簡單的一件事。

蒸得剛剛好，魚極之滑嫩，蒜蓉豆豉因為加入咸檸檬，酸香惹味，非常一流~~

最愛的，是魚腩的部位，豐富的油脂，入口即融的口感，配以酸香的醬料，正啊~~

魚尾用鹽略醃之後入鍋煎熟，起鍋熄火之後，贊入些許喼汁，起鑊~~

無得頂~~~

不過相較之下，我更愛蒸魚的清香與嫩滑~~

加上強哥親自落場炒的大白菜，一餐飯，搞掂~~

洋蔥炒蛋

今晚收得遲佐少少，雖然雪櫃總有半煲鹵肉，不過尋晚食過，今日又唔多想食佢，咁抄下雪櫃，剩有一舊仔餐肉，半個洋蔥，三隻蛋，咁就係最簡單地，整個洋蔥炒蛋啦。

先落少少油，炒香餐肉，然後倒入洋蔥，炒至略略軟身出香甜味，將打好嘅蛋液倒入去，煎香即成~~

無乜難度，係打蛋嘅時候，落少少鹽同少少白酒同一細細匙嘅油，咁樣炒出嚟嘅蛋又滑又香又有味~~




三幾分鐘，搞掂一碟餸~~

買佐一斤筒蒿，烚熟之後得咁少少喎，真係~~~

淋啲腐乳醬，好~~

一餐飯，半個鐘之內有飯開~~

超簡鹵肉飯

好鐘意食台灣嘅鹵肉飯，其實自己係屋企整，都絕對不是一件難事。

不過係咪叫做正宗，就絕對不敢咁講，但係美味，就係千真萬確。

睇下個樣，唔食得，都睇得下嘅~~

係啊，我好貪心㗎，除佐鹵肉，總一齊整埋排骨，同埋蛋。


趁周末係屋企得閒，整定一煲仔，起碼星期一二嘅餸有著落先。

同得大家分享嘅，當然係最簡單，最少功夫，卻是最好味嘅煮食方法。


做法：

1、五花腩一舊，用水烚熟（排骨都一樣，先出一出水）



2、五花腩切成細條狀，係鑊內炒一炒，逼出油份，加入二粒蒜，幾條薑絲，一起炒出味道。

3、將飛過水嘅排骨倒入鑊內，落「一粒八角、七八粒花椒、一細細塊香葉（無就唔洗落）」略略炒一炒。

4、倒入三四湯匙嘅豉油雞汁入去拌炒，令到豉油均勻地掛在肉表面。

係啊，完全無需擔心要落幾多生抽老抽糖或者酒嘅份量，一支配好味道的豉油雞汁，已經有齊生抽老抽薑味同酒味以及甜味，好方便㗎。

其實市面上的方便豉油，只要識得善加利用，係可以有無限變化㗎~~

5、最後，注入剛剛好浸過肉表面嘅水量，開細火，慢火煮一個鐘即可~~~

如果想食鹵水蛋，可以將雞蛋先用水煮熟，等鹵肉煮好之後，將蛋掉入鹵水度浸住一晚即成~~

無㗎啦，係咁多步驟咋，係咪好簡單咧，而且用嘅材料超級少，製作的過程超級簡易，有機會，你都試下`~

其實可以一次過鹵起多啲嘅鹵肉，擺入雪櫃，起碼都可以食幾日，每次盛足夠嘅份量出嚟加返熱就食得，配飯，配面，或者做為配菜，都係好方便㗎。

其它嘅食用方法總有好多，譬如買一舊豆腐，蒸五分鐘之後，將加熱好嘅鹵肉淋係豆腐面上，咁就又係一款好正嘅鹵肉豆腐，總之食法無窮無盡，在乎你嘅創意~~

因為五花腩嘅皮有好重嘅膠質，所以擺佐一晚嘅鹵肉，會瓊佐一舊舊，如果凈係鹵排骨，肉質會稍嫌粗糙，有佐膠質嘅鹵水排骨，滑好多㗎~~~



睇下，一餐我都係用佐一半出嚟加返熱佢食。

其實依個時候，可以做最後的補救，如果試過味道，唔夠咸或者唔夠甜，可以適當地再俾少少味落去，依個就視乎個人的習慣啦。

煮至略略收汁，咁，就食得啦，收工返到屋企，加熱返一碟鹵肉，都係七八分鐘左右嘅事，再炒多一個菜，就開得飯，係咪好簡單咧~~




只不過煮一煲嘅功夫，一次過可以有三種不同嘅味道選擇，總要係超級好送飯，正啊~~




我影緊相嘅時間，強哥係廚房幫我炒菜，炒得真係唔錯㗎，鹽嘅份量又落得恰到好處，加油啊老公，你是最好的，你知道嗎~~





裝佐一碟仔蘿蔔酸出嚟，雖然只不過係整佐一日，不過已經好入味，好正啦~~

我整蘿蔔酸又係超級簡單，略略介紹下，拉落啲，繼續睇~~


白醋加糖，我有包红糖买佐好耐，刚好开出嚟用，其实用红糖黑糖白糖冰糖，都无问题，随你钟意。

切少少指天椒入去，醋同糖我按差不多2：1的比例去開。

調好糖醋，落埋指天椒，擺好備用。



早幾年前喺街市十蚊雞買佐把多用途切刀，咁多年嚟用得最多都係切蘿蔔整蘿蔔酸。

將切好條的蘿蔔，直接擺入較好的糖醋汁，包好，擺一晚，搞掂~~~

就咁簡單，無需煲醋，無需處理蘿蔔，就咁切好浸住就可以食到又酸又甜又爽又脆嘅蘿蔔酸啦~~

 

 

 

真係，半個鐘開得飯~~~

正~~

 

餓雞

我係幾意食雞嘅人，早排無得食雞，其實又真係幾似新聞所用字眼「餓雞」

無得食，就梗係餓㗎啦，有得食，即刻食~~

強哥至愛我整嘅點醬「蒸魚豉油、辣椒仔、蔥粒、蒜粒、麻油」

關於麻油，買嘅時候，最好留意一下，成份係咪「100%」，因為大家可以見到麻油有貴有平，平貴之分，好多時，在於麻油嘅比例，有啲麻油，平少少，可能會溝佐其它食用油，咁最好當然係選購100%純麻油啦。

麻油其實常食用益，因為麻油含大量的維他命E同亞麻酸，適當的食用，可以起到軟化血管，保持血管彈性等功效，預防中風㗎.




唔同嘅，有靚雞食， 開心好多~~

三斤多啲啲，剛剛好~~

雪櫃凈少少五花腩，切片後同蒜苗炒埋一碟仔，無浪費。係無辣嘅回鍋肉。




炒碟紅菜心。

餸太多，又有食凈，菜就唔可以食隔夜，雞隔一餐食，都無妨嘅~~

煮俾愛婿的餸菜

好多年前，未結婚未識得強哥之前，自己開佐間舖頭，上居下舖嘅形式，好溫馨㗎，從未試過獨自生活，突然如此徹底地獨立，感覺新鮮又刺激。

雖然搬佐出嚟唔同阿媽一齊住，但係阿媽驚我唔識得照顧自己，隔二三日就會煮好多餸裝好一盒盒帶嚟俾我擺係雪櫃，肚餓就可以叮返熱嚟食，然後收走我換出嚟嘅污糟衫帶返屋企洗乾淨，下次再帶返嚟俾我換，當時年少無知，所有一切都習以為常，不覺有異，也理所當然地接受母親對自己無保留的愛。

是要過了這麼許多年，婚後母親覺得任務完成，已有人接棒照顧我，因此減少了對我的關懷，回想起，才覺出，當年母親對自己的好，應當珍而重之且感恩。


所以早幾個月前，初初返工嘅時候，母親到家中小住，幫我煮下飯，分擔下家務，日日收工返到屋企，可以食到阿媽煮嘅餸，原來，係咁幸福。

已經係二三個月前嘅圖片，依家先得閒擺上嚟~~


我成日笑稱強哥係阿媽最愛錫的女婿，所以簡稱「愛婿」，阿媽都凈係問強哥想食咩餸，然後就煮咩餸嘅，所以下圖所示，均為「煮俾愛婿的餸菜」

愛婿最愛食岳母整嘅涼瓜炒蛋~~~

愛婿好鐘意食嘅青椒炒牛肉。

兩大大碟~~~

另一日，水烚莧菜，阿女（即係我）收工返嚟，再整個腐乳醬淋上去，阿媽同愛婿同阿女都好鐘意食~~

阿媽同愛婿都好鐘意食嘅香煎秋刀魚~

清清哋嘅冬瓜燜排骨。

全家福~~

烚菜，淋蠔油~~

愛婿好鐘意食嘅咸蛋蒸肉餅~~

加埋一碟酸辣炒椰菜同埋青椒炒牛肉，大合照~~

岳母開始唔知煮咩啦，問愛婿，愛婿不嬲無乜主意嘅，咁就問返阿女，阿女話想食咖喱雞，毫無主見嘅愛婿一聽就急急腳地連連點頭。

咖喱雞喎，對於食咖喱長大的岳母嚟講，當然不是難事。

自家配制的咖喱膽，當然與別不同，愛婿開心死啦~~

如果唔係岳母係度，女婿應該都無乜機會飲得到嘅豆腐魚湯~~~

鮮美到連唔鐘意飲魚湯嘅阿女都飲佐幾啖~~

又烚菜！！~

全家福~~~

愛婿勁鐘意食嘅香煎黃花魚~~~

終於有一款係阿女點嘅啦，肉碎煮豆腐，阿女好鐘意食~~

蒜蓉炒麥菜~~

全家福~~



知道愛婿鐘意食煎炸嘢，開正外母果範啦~~~

阿女自細就係食煎炸嘢長大嘅，久經考驗，所以從來唔知熱氣為何物~~

岳母至拿手嘅酥炸大蕉~~~

原來我未炸過俾強哥食喎，強哥一食之下，驚為天人~~~

「乜大蕉可以炸嚟食㗎咩？？？」

「可以，連西蘭花都可以酥炸㗎」岳母如是解答~~

下次我自己整再影抵點整，再教過大家，其實好易整，而且又好味，好得意㗎，外脆，內軟，又香，又甜~~

水煮西蘭花~~

紅燒牛腩~~~

愛婿愛死依一味~~

全家福~~

見到愛婿如此歡喜，岳母隔佐幾日之後，又開爐，炸嘢~~~

依次係酥炸多春魚，其實炸嘢唔一定要好多油，少少油，半煎炸嘅方式就可以啦~~~

知道阿女又要影像，岳母話，加埋幾條荽莤，靚好多~~

果然，又靚，又好味~~

愛婿當然地，又係第一次食，又係，贊不絕口~~~

絕非拍岳母馬屁，依類香口嘢，又真係人見人愛嘅~~

食凈嘅牛腩，加埋啲蘿蔔入去，總好味~~

炒雜雜，乜都有炒一大碟~~~

全家福~~




有個叻叻煮食嘅岳母，係咪好幸福咧~~~