梅菜蒸豬肉附帶梅菜豬肉包

茄子切粗條隔水蒸熟，準備一個「黑醋，熟蒜蓉、砂糖」的汁水配食。

超級簡單的一味餸




三色椒炒肉片，好餸飯。

天熱都懶得整乜複雜嘅餸，簡單就最好。

夜晚蒸籠饅頭做早餐，發得好靚，個個笑開了口~~

另一日，馬拉盞炒椰菜。

蒸碟梅菜蒸豬肉。

有凈嘅肉，整佐一籠包。

個餡就直情係梅菜肉餅咁嘅味~~

又幾好味喎~~

但凡係肉相關嘅包，強哥都必定贊不絕口~~

儘量都係自己整啲包做早餐，好過買麵包食，麵包太多反式脂肪，食得多無益。

蓮藕湯、豆角炒肉絲

煲啖蓮藕湯飲。

買佐斤半蓮藕。



浸少少紅腰豆同蓮子。

豬尾骨一斤飛水。

所有材料加埋落水快速煲煲一個鐘。

我勁鐘意嘅蓮藕湯，凈飲湯食埋蓮藕，唔洗食飯~~

棒打豬八怪~~即係青豆炒豬肉~~

我鐘意食淋少少嘅青豆，所以肉絲先炒熟後裝起，再落豆角，燜淋少少，最後再落肉絲入去，俾埋啲回尾油再兜幾下，依味餸就完美啦`~

淋得嚟又夠味嘅一碟餸~~

開飯~~

住家小菜

最近通菜當道，又爽又嫩，買佐幾次嚟炒，最愛係椒絲腐乳炒。



斬條叉燒返嚟，咁就一餐~~

熱天食瓜食菜最多。

另一日，冬瓜切粗條雜炒。

準備其它配料，「黃花菜、冬菇絲、梅菜粒」

先爆香冬瓜以外其它配料，最後落冬瓜，俾啲水，落蠔油調味，煮熟即可。

好清爽的一碟餸~~

雖然賣相一般，不過餸飯一流~~

天熱無乜胃口，酸嘅就最好啦。

除佐雜炒冬瓜，整多味蕃茄煮豬扒。

依個晚餐，好簡單~~

另外一日，又食多次椒絲腐乳通菜~~

買佐幾個青椒，加埋少少免治豬肉，少少枝竹，炒埋一碟

通菜，青椒，全綠，煎多個荷包蛋俾強哥，等佢唔洗面似青菜一般綠~~

開飯~~

糯米怪至愛之黑糖椰香糯米糕

我有一個好痛錫我嘅媽咪，細個時為佐拓寬我嘅社交網絡，經常會鼓勵我邀請相熟嘅小伙伴返嚟屋企玩，然後佢就會整好多美味嘅點心招呼成班小朋友，不經意中，原來自己習以為常的一啲食物，對於其它小朋友嚟講，會係好多年之後記憶中的美食。

撞返幾個細時朋友，講返印象最深嘅，竟然係我阿媽手中的各款精美點心。

其中依款用阿媽說話嚟講：「真係簡單到不得了」的一款糯米糕，亦成為小伙伴心目中的經典之作。


材料好簡單：糯米、黑糖、椰粉

就咁幾樣材料，簡單的製作過程，超美味的味覺享受。

同大家講下做法。




糯米首先要煮淋煮熟，方式不拘，可以用舊式蒸熟嘅方式，又或者好似我咁，懶得浸咁長時間，就取巧地利用電飯煲嚟煮。

糯米洗凈之後，用清水浸半個小時，水嘅份量比普通煮飯用水嘅份量少大約一半，浸完之後，就煮飯咁，擺入飯煲煮熟即可。

煮好嘅糯米飯，趁熱，落黑糖同椰子粉，撈勻。

要趁熱去撈，如果唔係糖好難會融。

係非常非常奇妙的一種組合，黑糖加埋椰香，真係會散發出一種奇異地美妙，一種你無法想像的濃香與甜膩。

素來不嗜甜食的我，都深深地被依一種香氛吸引。

撈好味道的糯米，裝入一個容器之內，儘量壓實。

室溫下攤凍，食嘅時候取出切成各式造型。

依款糯米糕，就完成~~~

係咪超級簡單咧~~~

依款糯米糕，只適宜當日即整即食，隔夜之後糯米會變硬，食起上嚟會影響口感 。

當然如果整得多佐，亦可以第二日，再蒸返熱佢，再重新擺入容器之中攤凍再食，都可以嘅，不過麻煩啲。

我亦都諗過，隔夜嘅糯米糕，可以當成內餡，整返個黑糖椰香糯米包，應該都一樣好精彩~~~

成個過程睇落，係咪好簡單咧，有興趣嘅，試下啦~~

甜酸排骨

天熱最好飲冬瓜湯。

買佐磅西施骨，冬瓜一大舊，瑤柱二大粒，蝦乾幾條，意米一細碗仔。

加埋水，煲一個鐘，勁清甜~~

依啲湯水，清清啲，真係飲完都覺得好舒服~~

天熱真係唔想食飯，所以整啲生煎包嚟食下。

詳細做法可以參考依個網址「http://blog.yahoo.com/_TYO2LOZIMZEMASBBQ6KC3UYDUA/articles/14730」

煎包幾時都咁好食㗎啦~~

一大碗湯，加埋啲包包，食得好開心~~

重點推介嚟啦。

甜酸排骨~~~


雪櫃凈有一條青瓜，食得唔好嘥，切片後，先用油炒一炒，落少少生抽入味，兜幾下就拎起待用。

其實依個可以唔洗落嘅。

排骨斬好粒，唔洗醃，直接落鑊炒一炒至表面變乾身，然後落生抽老抽糖，加水燜煮大約二十分鐘。

最後落埋啲青瓜，落白醋調酸味。

醋無需太早落，因為落得太早，醋會揮發，而且會令到肉變到好靭，所以最後起鑊之前再落，可以有酸味同食到醋嘅香味。

食個時候可以試下味，如果太酸可以再落啲糖中和，如果覺得唔夠味，可以再落啲醋。

無一個硬性嘅比例，最緊要自己試下味，適合自己嘅味道就可以。

好適合熱天食嘅一碟餸，甜酸排骨~~~~

碌多碟菜，搞掂。

青菜肉絲麵

依個起碼係兩個月之前煮落嘅餸。

自己爭啲都唔記得佐添。

肉絲，薯仔絲，甘筍絲，炒埋一大大碟。

加多個蒜蓉生菜，咁又一餐。

自己一個人食飯。

碌佐碗麵。

炒多個青菜肉絲，碼上麵度，咁就一碗青菜肉絲麵。

清清啲，好鐘意~~

又另外一日。

雞蛋，甘筍，韭菜花。

加埋一大匙XO醬。

依稀記得，啲韭菜花，老過我阿婆，成碟餸，嘥~~

普通薯仔燜雞亦。


只不過係最尾落埋一大匙熟蒜蓉，成碟味道唔同哂~~

又係餸飯嘅餸~~

糯米包

其實我倆公婆都係糯米怪嚟嘅。

依款糯米包係強哥自細嘅至愛。

係好易整嘅一款包點。

整得雖然唔係太靚，不過味道，真係唔錯㗎~~

糯米水浸七八個鐘之後，上鑊蒸十分鐘至熟，順便蒸埋條臘腸。

炒多啲香菇粒，乾蔥，俾少少鹽同雞粉，臘腸切粒之後，所有材料同糯米撈勻，造型成一條四四方方嘅長柱型，依個步驟最好就要捏實啲，我就係捏得唔夠實，蒸好後個包包有少少瀉開，無咁靚仔。

然後準備一大塊發好酵嘅麵皮，將糯米條包好。

上籠蒸十分鐘之後，搞掂~~

又易又好味，早餐蒸返熱佢，又係好美味的一天開始~~

順手講埋個晚餐。

芹菜，甘筍，豆腐乾。

少少五花腩，少少豆瓣醬。

炒埋，勁好餸飯~~

之前煮意粉凈有少少醬，咁就加埋花菜煮一碟。

酸酸香香，非常好~~~