小菲菲俠自煮樂
原來牙虎要改版啊，唔知又會變成點嘅樣咧？
希望越嚟越就手就係啦，不過都係咁繼續寫㗎啦。
依幾日都係約佐強哥係地鐵站見佐，先一齊拖住手仔慢慢行三個字先返到屋企，通常見面之前我都會買定啲小食，咁一路行一路有啲嘢食下，返到屋企都無咁餓，咁我就可以慢慢係廚房整食，強哥先有力氣，係出邊掃地拖地。
今朝醃定左啲豬扒，今晚返到嚟，切少少洋蔥就煎得。
豬扒我就拍鬆後，先用「生粉水」浸一浸，等佢縮佐生粉水，咁煎好後唔會干爭爭。
然後落「豉油糖咖喱粉同芫莤籽粉」醃入味道。
然後豬扒同洋蔥一起落鑊煎熟，等洋蔥煎出焦糖，再俾返豬扒香味。
我先大火煎至豬扒兩面金黃，然後再落少少水，冚蓋焗一焗至熟透。
準備少少用「沙嗲糕」開好嘅沙嗲醬，豬扒起鑊前倒入去拌炒勻，即可。
沙嗲豬扒，搞掂~~~
雖然個樣唔靚，不過，極香，極香~~~
蒜蓉炒多碟菜。。。
我煎完豬扒無洗鑊，直接炒菜，等菜味道豐富少少，一舉多得`~~
全家福~~~
今晚返到屋企都差不多七點咁滯，如果唔係今朝出門口前預先醃定佐啲牛肉，驚今晚唔煮就會變壞，嘥哂啲牛肉，真係好懶得再落廚。
返到屋企俾電話強哥，佢總係灣仔就返嚟，本嚟真係想放棄煮飯落街食㗎啦，聽到佢總要大半個鐘先返到屋企，咁雪櫃又有餸，都係堅持下，煮埋餐飯算啦。
完全體會到平日全職要返工嘅人，收佐工返嚟總要煮飯嘅果種辛苦法~~~
我未試過六點幾咁夜先係街市買菜，原來真係無咩葉菜好選擇，睇到啲菜真係唔開胃，求其買佐啲白菜仔諗住同牛肉一起炒，然後再買幾個薯仔，唔洗點洗嘛，睇下點配搭煮埋餐飯。
咁就蒸埋碟飯先，蒸飯點都要二十分鐘先蒸得好，咁蒸飯嘅同時，就去洗菜。
牛肉早上已經預先切好醃好味，所以只需要再洗啲白菜仔，就可以開始炒菜。
好家常嘅一味白菜炒牛肉~~~
惹味好餸飯~~~
炒薯仔粒，薯仔唔需要點洗，削好皮，切粒粒就煮得。
我就煮佐一味「孜然薯仔粒」
哈，又真係幾似街食果啲喎~~
半個幾鐘煮好餐飯，強哥都剛好返到屋企，開飯~~~
原來煮飯嘅其間總可以抽空拖好埋地添㗎~~
不過好奇怪喎，又唔會覺得攰喎，係有少少覺得懶係真嘅，所以強哥就叫我依排唔好再煮飯，我好聽話㗎，佢話唔煮，我就奉旨唔煮啦，哈哈哈~~
應承網友整「陳皮鴨髀湯飯」，將過程用圖片記錄落嚟，等有興趣自己整嘅朋友，都比較簡單易明啲。
我細個時就好鐘意食湯飯，貪佢三幾下就可以扒哂入口，大個佐知道食飯同時太多湯汁，會衝稀胃酸，咁就會影響胃嘅消化能力，長久之後會導致胃病產生，所以湯飯一類，不宜經常進食。
先睇下制成品，係咪都似模似樣咧~~
做法：
1、鴨髀先用老抽同紹酒抹一抹係表面，稍稍醃十幾分鐘。
抹老抽嘅作用係等佢煎炸之後易上色，不作入味之用，所以無需醃好長時間。
2、取平底鍋一個，將皮向下，中細火乾煎數分鐘至表面金黃。
依個步驟，可以落油鑊炸，或者入焗爐烤，方式不拘，目的一係要逼到鴨皮底下嘅脂肪走出嚟，二係可以令到鴨皮金黃上色。
睇下，我完全無落油去煎，最後都煎佐幾多油出嚟~~~
煎好嘅鴨髀過一過熱水，衝走表面多餘嘅油份。
煎完鴨皮之後，走佐好多油出嚟，我留起佢，可以用嚟炒菜，煎出嚟嘅鴨油其實一啲都唔會膻，總好香添㗎，平時食得植物性嘅油脂多，偶爾食下動物性嘅油脂，其實都無防㗎，特別係發育期嘅小朋友，間中食下動物性嘅油脂，對促進腦部發育有極正面嘅影響，偶爾食下動物性嘅油脂，係唔會死人嘅，請大家放心。
3、準備少少香料「香葉一片、陳皮一塊、細粒八角二粒、薑一細塊」
如果八角較大粒，其實一粒已足夠，太多味就太重，搶走陳皮嘅香味就嘥哂。
我額外再落多幾粒花椒入去，咁啖湯會增加多一些香味，如果無唔落都得。
陳皮最好用靚啲嘅陳皮，何以謂之靚？去到藥房，自己聞下唔同年份嘅陳皮，自然會知道~~~
4、三個鴨髀，就落佐三碗水，加埋香料，落埋一湯匙嘅紹酒，燜煮至淋。
我用快速煲就煮佐二十分鐘已經非常淋軟，如果普通鑊去煮，起碼一個鐘以上。
煲到鴨肉已經好淋軟之後，將湯同鴨髀撈起，香料棄置不用。
將湯入邊多餘嘅油片走，等啖湯清爽啲。
煲好湯之後，落一細匙雞粉調味，食得重口味啲嘅，可以適當落少少鹽。
在阿媽的推薦下，我無用雞粉好耐，依家轉佐用下圖依款菇類提取嘅味素，炒餸落一細匙，連鹽都無需落，好清甜，而且完全唔會口渴，幾好㗎，百佳有售。
5、另起一個鑊，落少少油，爆香薑絲，炒香菇同冬瓜，落少少百菇精調味，贊少少水煮熟備用。
6、搵一個深碗，盛好飯，倒入炒好嘅冬瓜粒，飯面擺上鴨髀，再加入煮好的鴨湯，咁樣一碗「陳皮鴨髀湯」，就正式煮好啦~~~
一人一大碗，我總預備佐少少辣椒豉油配鴨肉食。
全程強哥不斷重複同一個字----------「正」！
「正」
「正」~~~~~
濃濃嘅陳皮香味完全融入湯水當中，所以我唔建議再加入咩芫莤蔥一類嘅嘢入去破壞煮得又香又濃又甜嘅湯水，冬瓜粒另外炒熟而唔係加入鴨湯入邊煮熟嘅原因都係一樣，唔想因為冬瓜衝淡佐鴨肉煮好的陳皮湯本身的香味。
雖然咁樣一味湯飯，功夫係多佐少少，然，你試試，試過就知道，得一個字
「正」~！！！！
買佐盒免治豬肉諗住蒸肉餅食嘅。
不過蒸肉餅食得多都覺得好悶，所以臨時改變主意，改蒸為煎。
豬肉嘅醃法同之前幾日生煎包嘅味道一模一樣，加佐洋蔥，香好多。
醃好嘅豬肉，用手窩來回拍來拍去整成一個個肉丸。
然後落少少油，半煎炸嘅方式將肉丸煎至表面金黃。
我就用佐中大火去煎，務求快手將表面煎至金黃，熟透未唔緊要，因為稍後總要做其它嘅處理。
煎二三分鐘左右即可。
睇下，二分鐘左右就煎好嘅肉丸，表面煎勻就可以啦。
將煎完之後嘅油倒入另一個碗碟度，可以愛嚟炒餸，唔會嘥油，可以睇到我用嘅油其實係好少量嘅。
煎好肉丸之後，原鑊落薑片同香菇絲爆出香味。
然後將浸發好嘅腐竹，同煎好嘅肉丸，倒埋入鑊，落清水，豉油糖，燜煮十五分鐘左右。
燜好之後，將材料擺入碟，凈抵嘅醬汁埋個芡收汁，淋上肉丸面，依碟餸即成~~~
雪櫃凈有少少娃娃菜，碌熟擺埋入去同食，解佐幾分肉膩感~~
我就最鐘意食縮佐肉汁嘅腐竹，好好味~~~
強哥個肉魔，至愛唔洗講，一定係香噴噴軟綿綿嘅先煎再燜過嘅肉丸啦~~
咁樣一碟餸，乜都有，一樣一啲一大碟~~
肉丸有凈，無煎到，愛嚟同蕃茄薯仔滾佐一個湯~~
好開胃~~
全家福~~
肉丸嘅故事未完，總有凈㗎~~~
咁就取佐幾粒，愛嚟整肉餅，咁第二日嘅早餐就有著落啦。
依類煎餅嘅食譜我以前寫過好多，有興趣可以係我站內搵返~~
可以用「煎餅」二字去SEARCH，我主頁面嘅頂有一個位可以做站內博文搜尋。
尋日整好，擺入雪櫃，低溫發酵佐一晚，今朝先煎嚟食。
睇下，因為碟底有俾啲粉，所以第二日發酵完嘅面餅都會痴底，好易就拎起落鑊煎到㗎啦~~
薄薄一層肉，加埋煎到香噴噴嘅餅，咁樣嘅早餐，我同強哥都至愛~~
有凈嘅肉丸可以擺返入雪櫃雪硬佢，下次滾湯嘅時候可以取出嚟用，完全唔會有嘥~~
關於鑊，相信係每一個初入廚者都非常之關心及頭痛嘅問題。
就自己由初初煮飯直至依家換過嘅鑊及少許心得做一個集合講述。
因為一開始學炒餸，我就係用電磁爐，所以關於鑊，最主要嘅功能係要可以上得到電磁爐。
因為都知道易潔鑊如果使用不當，會對身體產生好大影響，所以一開始買廚具，已經心中有數，主力炒餸嘅鑊，一定係無涂層，並且可以上得到電磁爐嘅鑊。
第一鑊：中式生鐵鑊
先講返我買嘅第一款「天X野」生鐵鑊，同一牌子同一款號我用佐二個。
詳細請睇返依個網址「請點擊依度」
第二鑊：中式生鐵鑊
唔係貴就一定係好，所以果個牌子的生鐵鑊壞佐之後，我就走去街市買佐第二個可以上得到電磁爐嘅生鐵鑊，不過因為製造工藝的唔同，第二個生鐵鑊，係好易生銹，煮完餸之後要即刻抹乾身，如果唔係第二次炒餸，鑊一抹全部都係銹跡，用得好麻煩，詳細內容可以睇返依個網址「請點擊依度」
第三鑊：不銹鋼平底鑊
係第二鑊同第一鑊之間，我其實總買過一個不銹鋼鑊，原本只係打算買多個傍身以備不時之需嘅，誰知第二個生鐵鑊成日生銹，搞到我無心機用，所以後嚟好長一段時間，我都係主力用依個不銹鋼鑊蒸飯炒餸蒸嘢，乜都搞得掂。
其實依個不銹鋼鑊炒餸都OK架，佢本身幾厚底，厚底嘅鑊有一個好處，加熱之後，佢唔會太快冷卻，所以炒餸好夠熱力，炒菜只要一路開大火炒，佢就可以鎖住菜嘅水份，炒好嘅菜即有鑊氣，又唔會水汪汪，而且不銹鋼唔會生銹，又夠堅硬，我極粗用成年之後都完好無缺。
若果唔係我後期換佐一個電陶爐，無佐用電磁爐，依個不銹鋼鑊因為太厚底，所以加熱嘅速度太慢。我都一定唔會換佐佢，會繼續用依個不銹鋼鑊去做主力炒餸用。
詳細內容可以睇返依個網址「請點擊依度」
第四鑊：陽極鑊
係為佐配合我新買嘅電陶爐而置的新鑊，一路用緊到依家，佢較薄身，對於明火或者電陶爐嚟講，傳熱較快，炒餸會較容易，佢兼顧佐生鐵鑊炒餸有鑊氣，炒出嚟嘅餸或者煎出嚟嘅蛋都會更香之餘，並且完全唔會生銹亦唔會變形，我點粗用都無問題，用佐將近一年時間，都覺得非常滿意，我諗如果依個鑊再壞佐，我依然會買返同一材質嘅鑊返嚟用。
詳細內容可以睇返依個網址「請點擊依度」
屋企常備有的鑊，除佐上邊提及嘅幾款無涂層嘅鑊，其實一路會保持有一個易潔鑊，用嚟煎魚，煎生煎包等依類較難控制嘅食物的製作，就自己個人心得體會，其實無論用任何鑊，最緊要嘅係使用者識唔識得控制佢哋，千其咪被個鑊，掉返轉頭，去控制佐你使用的方向，鑊之嘛，係為人類烹煮而產生㗎，選擇自己適合的鑊，慢慢去摸清佢嘅脾性，咁就用咩鑊，都無有怕啦`~~
總之一句講哂：「無不是之鑊，只有不識用之人」
星期日去搵阿媽飲茶，帶佐幾隻朋友送嚟嘅樹上熟嘅芒果返嚟。
真正樹上熟嘅芒果，真係甜到透心~~~
果種香味，真係擺係廳，成間屋都香噴噴~~
就咁睇係睇唔到有幾大，頭先走去磅佐下，兩個芒果，已足有一斤二兩重喎~~
真係又多汁又香濃~~
不過我重點唔係想講芒果，其實我想講係一種用糯米粉整嘅「蟲仔」。
係尋日為佐芒果而突發奇想整到出嚟嘅一種副產品。
先講下材料及份量：「糯米粉二湯匙」
「木薯粉半湯匙」
將糯米粉同木薯粉撈勻，然後衝入滾水，碌熟一部份粉。
然後加入普通涼水將粉開稀。
準備一個打邊爐用嘅漏勺，將開好的粉漿倒入漏勺度。
煲滾一煲水，等粉漿從漏勺入邊滲佐落滾水度，即刻浮起煮熟，而且一粒粒，係咪好似一個個蟲仔咁得意咧~~~
同我想像中嘅效果一模一樣啊，因為糯米粉為主，所以咬起上嚟，煙煙韌韌，又因為加佐木薯粉，所以就算凍佐，都唔會係一味的硬，軟糯中，帶有少許的彈性，非常理想啊依款糯米小蟲仔~~~
有無食過印尼甜品嘅珍多冰咧？入邊果種一粒粒嘅，口感就係差唔多依個蟲蟲咁嘅味道啦~~~
做成功一次，以後可以變化的食法同配搭，可以有好多好多種，等我慢慢再諗過食法再同大家分享過啦~~~
點解我要整糯米蟲仔咧？
就係為佐要整楊枝甘露而做嘅。
我唔想為佐一餐半餐走去買成包西米返嚟，用得一次然後又掉佐咁哂，所以先自己諗過其它代替品，咁就整到咁樣一款糯米蟲仔出嚟啦。
啲芒果真係粒粒都咁靚㗎~~~
咁樣睇唔出比例，其實個芒果好大一粒㗎，我只用佐三個芒果，已經整好一大大兜嘅芒果甜品出嚟啦。
楊枝甘露應該大家都識得整㗎啦，我就唔洗多講啦，各家都有喜歡的味道，有人加花奶，有人加椰漿，有人加忌廉，我唔鐘意食得太流嘅味道，只清清啲嘅，芒果肉加埋鮮奶，打融佢。
然後加埋我整嘅糯米蟲仔，同埋一啲柚子肉，一啲粒粒嘅芒果肉，擺入雪櫃，搞掂~~
飯後甜品就係佢啦~~~
強哥食到一粒粒嘅糯米蟲仔，總以為係小丸子添，猛贊得意，又滑又軟糯嘅口感，配埋香濃的芒果肉，真係享受`~~
飲完甜品，強哥拎出星期日佢買到嘅戰利品出嚟玩~~~
好大一份說明書啊~~~
咪就係變形金剛囉~~~
變變變，變成一架車出嚟啦~~~
又真係幾得意，好多嘢好玩喎~~~
不過我就覺得美國嘅玩具，真係無日本出嘅咁精緻啦，即係手工方面咁講~~
嗶嗶嗶，廚房無芒果，請鐵皮先生即刻送個過嚟救下急了為~~~
